بلوچ یکجھتی کمیٹی ءِ سروک ڈاکٹر ماہ رنگ شمبے ءِ روچ ءَ شال پریس کلب ءَ گوادر ٹٹ ءِ باروا برجاھیں دیوان ءَ تران کرتگ ءُ گوشتگ کہ بلوچستان ءَ بلوچ ءَ ابید دگہ ھچ وڑیں پجار نیست۔ بلوچستان چہ درساں پدمنتگیں ڈیھے، اگاں ھساب کنگ بہ بیت گڑا پاکستان ءِ بیست دمگانی تہ ءَ پدمنتگیں ھژدہ دمگ بلوچستان ءَ بنت۔
آئی ءَ گوشتگ کہ مشکے یک انچیں لشکرے ءِ دست ءَ دیگ بوتگ کہ آ مردماں مزدوری پرمائیت، سھب ءَ درسیں مردماں وتی بنجل ءَ لوٹائین ایت ءُ سرجمیں روچ ءَ کار گیت ءُ شپ ءَ آیاں یل کنت۔ مرچی بلوچستان ءِ ھمک پھنات لشکر ءِ دست ءَ اِنت، مشکے ءَ یک ٹریپک پولیس ءِ اگدھے لشکر ءِ کرنلے ءَ گوں اِنت، شمارا مشکے یا آواران ءَ روگ ءُ ویزا گرگ ءُ ٹپہ جنگ لوٹ ایت۔
ڈاکٹر ماہ رنگ ءَ گوشتگ کہ وتگڑیں سیاسی پارٹی بلوچستان ءِ سودا ءَ جنگ ءَ اَنت، وتگڑیں شوربندیانی اوگام جنوکاں بلوچستان گوں لشکری بنجلے ءَ مٹ کرتگ۔ بلوچستان ءِ دریا ءُ مدیانی اولی ھک بلوچ ءِ اِنت، بلوچ ءَ وتی دریا ءُ مڈی وت پھریزگی اَنت ءُ ایشی راہ بلوچ راجی گھگیری اِنت۔
آئی گوشتگ کہ بلوچستان سرجم ءَ جنگ آماچین دمگے اد ءَ ریاست وتی زور ءُ مڈیاں کارمرز کنگ ءُ بلوچ چکچینی کنگ ءَ اِنت۔ اے چکچینی ءَ دودمانی ءُ سیاسی چکچینی ھوار اَنت۔ اے چکچینی ءَ بلوچ راج ءِ پجار، دودمان ھچی پھریز نہ اِنت، گوادر ءِ ٹٹ چکچینی شونداتے۔
