کراچی: بی ایس او کراچی ھنکین ءِ نیمگ ءَ "کراچی ءِبلوچانی آکبت ” ءِ بنگپ ءِ سر ءَ ملیر ءَ دیوانے برجم دارگ بوتگ۔ دیوان ءِ سروکی بی ایس او ءِ سرکما ش بالاچ کادر کرتگ ءُ مھمان بلوچ اکیڈمی شال ءِ سرکماش سنگت رپیک بوتگ۔ دیوان ءَ کراچی زانشتجاہ ءِ پارسی بھرگ ءِ سرکماش ڈاکٹر رمزان بامری، بلوچی زبان ءِ نبشتہ کار گلام رسول کلمتی ، سیاسی کارکن کامریڈ ھپیزءُ ھنیپ دلمراد ءَ تران کرتگ۔
آیاں تران کرتگ ءُ گوشتگ کہ کراچی بلوچ راجدوستی ءُ نوکیں بلوچ لبزانک ءِ بنجاہ بوتگ۔ پہ بلوچی زبان ءِ دیمروئی ءُ لبزانکی کارانی دیم ءَ برگ ءَ کراچی ءِ جوانیں کردے بوتگ۔ 1951ءَ کراچی ءَ مھتاک اومان ءِ شنگ بوگ ءَ بگر داں لبزانکی انجمنانی جوڑ بوگ ءَ کراچی ءَ مدام لبزانک ءِ دیمروئی ءَمزنیں کردے پیلو کرتگ۔ بلوچ نودربر سیاست ءِ بندات چہ کراچی ءَ بوتگ چہ ایشی ءَ پد شست ءِ دھک ءَ بی ایس او جوڑ کنگ بیت۔ نودربر سیاست بہ بیت یا ماس پارٹی بہ بنت کراچی ءِ مدام جوانیں کردے بوتگ۔
آیاں تران کرتگ ءُ گوشتگ کہ کراچی ءِ جاہ منندیں بلوچانی مُچی زانشت ءُ سیاسی مھکمی ءِ ھلاس کنگءَ جتائیں زور چکاسگ بوگ ءَ اَنت۔ ھمے پارست ءَ گینگوار ءپیم ءَ کشندہ ٹولی جوڑ بوگ ءَ اِنت۔ سیاسی سروک ءُ شھزانتیں مردمانی نشانگ کنگ ءَ یک انچیں ترسے برجاہ داشتگ کہ چہ ایشی ءِ سوب ءَ کراچی ءِ سیاست ءُ لبزانک ءِ سر ءَمزنیں سانے کپتگ۔ ھزار سال پیش اد ءَ آبادیں بلوچانی ڈگارانی دستیگ کنگ ءُ آبادیاں گوں کمیں مٹ کنگ برجاہ اِنت۔ بھریہ ٹاؤنءِ وڑ ءَ لٹ ءُ پلی شوربندی ءِ مراد ھمیش اِنت کہ بلوچ چہ وتی ڈگاراں کشگ بہ بنت۔
آیاں تران کرتگ ءُ گوشتگ کہ انگریز زورگر ءَ بلوچ سرڈگار ءِسر ءَ یک وتساچیں لکیرے کش اتگ ءُ ھمیشی پارست ءَ بلوچانی بھر ءُ بانگ کنگ ءُ سیاسی توان ءِ ھلاس کنگ ءِ جھد کرتگ۔ بلے بلوچ کج ءَ کہ جاہ منند اِنت آئی درد یک اَنت۔
