آواران: مشکے ءَ زورگریں پاکستانی لشکر ءَ دو براتاں ھوارشش مردم آوار جنگ ءَ پد بیگواہ کرتگ۔
اھوالکار ءِ رد ءَ زور بیگواہ کنگ بوتگیں مردمانی نام امجد ء زمیندار دین مھمد، الی ء زمیندار دین مھمد، مھبوب ء شھید یار جان، تاج مھمد ء مھمد ابراھیم، بلوچ ءدل مراد ءُ ابداللہ ء ا بدالکادر اِنت کہ گورجک ءِ جاہ منند اَنت۔ مرچی سھب ءَ زورگریں پاکستانی لشکر ءَ مشکے ءِ میتگ گورجک ءَ بیڑ برتگ ءُ الی، امجد ءُ مھبوب آوار جتگ ءُ بیگواہ کرتگ اَنت۔
آئی گوشگ اِنت تاج مھمد ءُ بلوچ پہ زوربیگواھیں مردمانی یل کناھینگ ءَ پاکستانی لشکر ءِ بنجل ءَ شتگ اَنت لشکر ءَ آوار جتگ ءُ بیگواہ کرتگ اَنت۔ مردماں زوریں بیگواھی ءِ بگیری ءَ زھرشانی روانکے کش اتگ چہ گورجک ءَ داں ملشبند ءَ شتگ اَنت ءُ دگ اِش بند کرتگ، پاکستانی لشکر ءَزھرشانی جاہ ءَ ابداللہ ء ابدالکادر آوار جتگ ءُ بیگواہ کرتگ۔
زور بیگواھیں مھبوب ءِ باروا گوشگ بوگ ءَ اِنت کہ آئی پت یار مھمد ءَ پاکستانی لشکر ءِ جوڑ کرتگیں کشندہ ٹولی ءِ کارمنداں 19 جون 2017 ءَ پنجگور ءِ ھند گچک ءَ تیرگواری کرتگ ءُ شھید کرتگ۔ مھبوب ءَ دیر اِنت کہ پاکستانی لشکر پہ پیشی گرگ ءَ بنجل ءَ لوٹائینگ ءَ بوتگءُ مرچی سھب ءَ چہ گس ءَ آوار جتگ ءُ بیگواہ کرتگ۔
