کراچی: پاکستانی چیریں ادارھانی دست ءَ سندی راجدوستیں سروک ھدایت لوھار ءِ ناھکیں کوش ءَ سندی راجدوستیں باسک بشیر شر، یوسپ شر، ساجن ملوکانی، شوکت ملوکانی، نئیم ملوکانی، پٹان ھان زھری، مرتزا جونیجو، ایوب کاندھڑو، انساپ دایو، زپر چانڈیو، سرویچ نوھانی، اجاز گاھو ءُ رزا بھٹی ءَ ھوار پہ آدگہ سیاسی باسکانی ریاستی لشکر ءِ دست ءَ زوریں بیگواھیانی بگیری ءَ سرجمیں سند ءَ زھرشانی کنگ بوتگ۔
سند ءِ بنجاھی شھر کراچی ءَ ریگل چاراہ ءَ داں کراچی پریس کلب ءَ زھرشانی روانکے کشگ بوتگ، اے روانک ءَ سورٹ لوھار، سارنگ جویوءُ سھنی جویو ءَ ھوار آدگہ سیاسی سروک ءُ باسکاں بازیں کچے ءَ بھر زرتگ۔
ھمے وڑ ءَ نسیرآ باد ءَ جسٹس پار ھدایت لوھار کمیٹی ءُ وائس پارمسنگ پرسن آپ سند ءِ سروک سسی لوھار ءُسارنگ لوھار ءِ سروکی ءَ زھرشانی روانکے کشگ بوتگ۔
زھرشانی ءَ مردماں تران کرتگ ءُ گوشتگ کہ شھید ھدایت لوھار یک وانگجاھے ءِ استاد ءُ یک سیاسی باسکے بوتگ آریاستی چیریں ادارھاں 16 پروری ءَ نسیر آباد ءَ نشانگ کرتگ ءُ شھید کرتگ۔ پد ءَ پاکستانی چیریں ادارھاں بشیرشر، یوسپ شرءُ ساجن ملوکانیءَ ھوار باز سندی سیاسی باسک آوار جتگ ءُ بیگواہ کرتگ۔
آیاں گوشتگ کہ ما گوں اکوام متھدہ، ایمنسٹی انٹرنیشنل، ایشیں ھومن رائٹس کمیشن، یورپی یونین ءُ جھان ءِ درسیں مردمی ھکانی ادارھانی گون ءَ لوٹ کن ایں کہ آ پاکستان ءِ نیمگ ءَ سندءُ بلوچستان ءَ برجاھیں مردمی ھکانی لگتمالی ءُ سیاسی سروک ءُ باسکانی زوریں بیگواھی ءُ کوش ءِدرگت ءَ گامگیج بزور اَنت۔ مئے زھرشانی سرجمیں سند ءَ برجاہ بیت۔
سند ءِ جتائیں ھند ءُ دمگاں سندی راجدوستیں گلانی نیمگ ءَ ریاست ءِ زوراکیانی بگیری ءَ زھرشانی کنگ بوتگ ءُ سیاسی سروک ءُ باسکانی ھواری ءَ مردماں بازیں کچے ءَ بھر زرتگ ۔
