بلوچ یکجھتی کمیٹی ءِ سروک ڈاکٹر ماہ رنگ ءَ وتی شنگ کرتگیں تامربندے ءَ گوشتگ کہ گوادر ءِ ٹٹ ءِ کنگ ءِ مول گوادر ءِ جاہ منند ایں مردمانی زندگی ءِ ھم ھمے ٹٹ ءِ تہ ءَ بند کنگ اِنت۔جھان ءِ تہ ءَ ھچ جاہءَ اے وڑیں آبادی نیست کہ آ چاریں نیمگاں ٹٹ ءِ تہءَ بند کنگ بہ بنت۔ جھان ءِ تہ ءَ چوشیں مزنیں زندان نیست کہ سرجمیں آبادی زندان ءَ بند کنگ بہ بیت، بلےمئے گون ءَ بوگ ءَ اِنت۔
آئی ءَ گوشتگ کہ اے کار ھما وھد ءَ بندات بوتگ چائنا گوادر ءَ میگا پروجیکٹ سی پیک ءَ بندات کنت ایشی مول ھمیش اِنت گوادر ءِ جاہ مننداں چہ گوادر ءَ در پہ در بہ کنت، انچو لاچار کنگ بہ بنت کہ آ وتی سرڈگار ءَ یل بہ کن اَنت۔ ھما اِنت سی پیک بندات بوتگ گوادر ءِ مردم چہ لشکرکشیاں دلسیاہ بوتگ اَنت۔ سدانی کچ ءَ انچیں مردم ھست اَنت کہ آیانی آزیز بیگواہ کنگ بوتگ اَنت۔
ڈاکٹر ماہ رنگ ءَ گوشتگ کہ چہ درسیں زوراکیاں ابید گودار ءِ مردماں وتی سرڈگار یل نہ داتگ ءُ نشتگ اَنت۔ نوں مئے شمئے سر ءَ اِنت کہ ما وتی سرڈگار ءَ چون بہ رکین ایں۔ من گوں درسیں مردماں دزبندی کن آں کہ گوادر ٹٹ ءِ بگیری ءَ بلوچ یکجھتی کمیٹی ءِ برجاھیں زرمبشت ءِ کمک ءَ بہ کن اِت۔
بلوچ یکجھتی کمیٹی ءِ نیمگ ءَ گْوادر ٹٹ ءِ بگیری ءَ باندا زھرشانی روانکے کشگ بوگ ءَ اِنت من گوں درسیں مردماں لوٹ کن آں کہ اے زھرشانی روانک ءَ بھر بزور اَنت۔ ڈاکٹر ماہ رنگ
