کیچ: 2 مئی ءَ چہ نوانو، زامران ءَ پاکستانی لشکر ءِ دست ءَ زور بیگواہ کنگ بوتگیں ورنا شھزاد ابید ءُ داؤد اَبدالوھاب ءِ کھول ءَ وتی شنگ کرتگیں درشانے ءَ گوشتگ کہ 2 مئی ءَ چہ نوانو ،زامران ءَ زور بیگواہ کنگ بوتگیں ورنا انگت بیگواہ اَنت۔ آ ھما وھد ءَ برگ بوتگ اَنت کہ پاکستانی لشکر ءِ مزنیں کاروانے دشتک زامران ءِ نیمگ ءَ روگ ءَ بوتگ۔
آئی گوشتگ اِنت کہ شھزاد ابید ءُ داؤد ابدالوھاب نزیکیں باگ ءَ شتگ اَنت پاکستانی لشکر ءَ آوار جتگ ءُ بیگواہ کرتگ اَنت۔ بیگواھیں ورنایاں یک سوزوکی پرپٹے ھم گوں بوتگ۔
کھول ءَ گوشتگ کہ دمگی واکدار ءُ ادارھانی کر ءَ ما مدام شتگ ءُ پریات کرتگ پہ مئے زھگانی یل کنگ ءَ انگت ءَ ھچ وڑیں گامگیج زورگ نہ بوتگ۔ اگاں مئے زھگ میاربار اَنت گڑا آ کانود ءُ راھبند ءِ رد ءَ سزا دیگ بہ بنت اے وڑ ءَ بیگواہ کنگ کھولانی آزار دیگ اِنت۔
آئی ءَ دیمتر ءَ گوشتگ کہ ما باز اوپار کرتگ بلے مئے گون ءَ انساپ کنگ ءَ نہ اَنت نوں ما لاچار ایں کہ زھرشا نی بہ کن ایں۔ اگاں شھزاد ابید ءُ داؤد ابدالوھاب آجو نہ بوت اَنت ما ڈی بلوچ ءَ ھوار کیساک ءَ زھرشانی ءَ دگ ءَ بند کن ایں ءُ نند ایں۔
کھول ءَ سیاسی ءُ مردمی ھکانی گلانی گون ءَ لوٹ کرتگ کہ آ گوں شھزاد ابید ءُ داؤد ابدالوھاب ءَ ھوار پہ آدگہ زور بیگواھیں مردمانی آجوئی ءَ توار چست بہ کن اَنت۔
