بلوچ راجی زْرمبشت ( بی این ایم ) ءِ مردمی اگبالانی تک پانک ءَ بلوچستان ءِ مردمی اگبالانی جاور ءِ سر ءَ اپریل 2024 ءِ گزارش شنگ کرتگ۔ایشی ءِ تہ ءَ ماں بلوچستان ءَ درآمیدگسی کوش ءُ زوربیگواھیں مردمانی نام ءُ پجار مان اَنت۔ گزارش ءِ رد ءَ گوں پاکستانی لشکر ءَ بندوکیں تْرامگیجاں درآمیدگس ءُ ناراھی دزگیری ءَ پد 37 کس زور بیگواہ کرتگ۔21 چہ پیسر ءَ زور بیگواہ کنگ بیتگیں مردم یلہ کنگ بیتگ۔
گزارش ءِ رد ءَ 11 اپریل ءَ ملک ربا ء گل مھمد مری چہ مچی پانگس ءَ دزگیر کنگ بیتگ اَت ءُ 13 روچ ءَ پد آئی ءِ کنٹ چہ سیبی ھنکین ءَ دست کپتگ۔
پانک ءِ ماھی گزارش ءِ تہ ءَ یک رندے پد ءَ گْوشگ بیتگ کہ 14 اپریل ءَ لیویز کارمند برکت ساجدی ءِ مرگ وتکشی نہ بیتگ بلکیں مھترھندی کوشے اَت۔ پانک ءَ ھمے بارہ ءَ جتائیں پٹ ءُ پولی گزارشے ھم شنگ کرتگ۔
پانک ءِ ماھی گزارش ءِ رد ءَ اپریل 2024 ءَ چہ شال ءَ 3 ، چہ کیچ ءَ 8 ، چہ آواران ءَ 12 ، چہ کوھلو ءَ 1 ، چہ گوادر ءَ 4 ، چہ ڈیرہ بگٹی ءَ 1 ، چہ کزدار ءَ 2 ، چہ ھاران ءَ 1 ، چہ ھب ءَ 3 ءُ چہ چاگے ءَ 2 کس زور بیگواہ کنگ بیتگ۔
گزارش ءَ گوادر ءَ ٹٹ ءَ کنگ ءُ چہ آمیدگس ءِ نیمگ ءَ راشد ھسین کیس ءِ گوش نہ دارگ ءِ جیڑہ گْوستگیں ماہ ءَ بیوکیں مردمی اگبالانی سھرائیں بگیریانی رنگ ءَ دیم ءَ آرگ بیتگ اَنت۔پانک ءِ گزارش ءِ رد ءَ مردمی اگبالانی کارکن راشد ھسین ءِ زوربیگواھی جیڑہ ءِ سر ءَ آمیدگس ءِ دیم ءَ پیش بیوکیں نامی ئیں وکیل ایمان مزاری ءَ آمیدگسی کارروائی ءِ سر ءَ نادلجمی درشانتگ ، اے نادلجمی مردماں بے تاھیر ءُ دلپروش کنت۔
گزارش ءَ گْوشگ بیتگ پاکستان ءِ آمیدگس ناسنگینی ءِ درانگازی کنگ ءَ اَنت چہ ایشی ءَ زور بیگواھیانی بارہ ءَ چہ پیسر ءَ نزوریں اوست گیشتر دلپروشی ءِ نیمگ ءَ روگ ءَ اِنت۔چوناھیں مھترھندی ءِ آمیدگسی تْرام سرکار ءُ وکداراں آئٛین ءُ راھبندانی تہ ءَ کار کنگ ءَ پرمائیت۔ھما اود ءَ کہ آمیدگس وتی کاراں کن اَنت شھرمنندانی بے تاھیری ءِ تہ ءَ سھرائیں رنگے ءَ کمی کئیت ءُ شھرمنندانی اگبال پھریز بہ اَنت بلے پاکستان انچیں مھترھندے کہ آئی ءِ آمیدگس وت اے من اَنت کہ آ آزاد نہ اَنت۔
پانک ءَ زور داتگ کہ راجانی سنت ءِ مردمی اگبالانی تْرامگیج چہ پیسر ءَ گیشتر پرکار بہ بہ اَنت ءُ پرتوانیں ڈیھاں بہ گْوش اَنت کہ آ پاکستان ءَ زور بیگواھیانی بارہ ءَ گپ بہ جن اَنت۔پہ راجانی سنت ءِ باسکیں ڈیھے ءَ چوشیں مزنیں رنگے ءَ مردمی اگبالانی لگتمالی آسان ءُ ڈالچار کنوکیں جیڑھے مہ بیت پرچا کہ راجانی سنت اے گپ ءَ گیشین ایت کہ زور بیگواھی تیوک ءَ مردم ءُ کھولے ءِ بگیری ءَ جیڑھے نہ اِنت بلکیں مردمگری ءِ بگیری ءَ میارے۔بدبھتی اِنت راجانی سنت ، میان استمانی راھشون ءُ مردمی اگبالانی تْرامگیج دو دھکاں برجاھیں زور بیگواھیانی دْرچے ءِ دارگ ءَ بے سوب اَنت ، ھمے گپ اے تْرامگیجانی سر ءَ بلوچانی اوست ءَ سک باز نزور کنگ ءَ اِنت۔
پانک ءَ شیوار کرتگ کہ گوادر ءَ باڑ جنگ ءِ جیڑہ نوکیں گر ءُ چیلے جوڑ بیت کنت، چہ ایشی ءَ بلوچستان ءَ مردمی اگبالانی بدیں جاور چد ءُ گیش بد تر بیت۔
گزارش ءِ رد ءَ ، گوادر شھر ءِ بارہ ءَ مھترھندی تک ءِ دیدانک ناں ایوک ءَ بلوچ راج ءُ مھترھند ءِ نیام ءَ دیریاں دیر تر کنت بلکیں اے جیڑہ سرجمیں بلوچستان ءَ سانمند کنت۔پرچا کہ پاکستانی اسٹبلشمنٹ اے گپ ءَ دیم ءَ آرگ ءَ اِنت کہ گوادر زر زرتگیں دمگے، ایشی ءَ گوں بلوچ راج ءَ ھچ سیادی نیست۔اے گْوستانکی راستیانی بگیریں دیدانک اِنت ۔ھمے دید گوادر ءَ ٹٹ ءَ کنگ ءُ آئی ءَ چہ بلوچستان ءَ گستا کنگ ءُ آ اود ءَ پترگ ءُ نندگ ءَ گچینی کارڈے ءِ جوڑ کنگ رنگیں شورانی بنیاد اِنت۔پاکستان ءِ پھازدار وتی بے سوبیاں شھرمنندانی سر ءَ لڈگ لوٹ اَنت۔
چہ پانک ءِ نیمگ ءَ گوادر ءَ سرمایہ کاری ءِ واھگداریں ڈیھاں دزبندی کنگ بیتگ کہ آ اے جیڑہ ءِ گر ءُ دار کوشست بہ کن اَنت داں آیوکیں روچاں مردمی ویل ءِ دیمپانی کنگ بہ بیت۔
