شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5437 روچ سرجم بوتگ۔ دوشمبے ءِ روچ ءَ ایڈوکیٹ اھسن مینگل، بارکان اتھاد ءِ سروک ازیز ءُ آدگہ مرد ءُ جنین پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ وتگڑیں راھشون ءُ ٹولی بے ترس ءَ وتی سیاست ءِ رد ءَ بلوچ پسگاں زور بیگواہ کنگ ءُ بندیگجاہ ءَ آیاں شھید کنگ ءُ لاشاں چگل دیگ ءَ اَنت۔ پاکستانی لشکر ءُ چیریں ادارھانی کارمنداں کشندہ ٹولی کمک کنگ ءَ اِنت۔
آئی ءَ گوشتگ کہ گوستانک بے رھم اِنت بازیں مردم گوستانک ءَ راجدروہ لیک اتگ اَنت۔ پہ مردمگری ءَ دردواریں بازیں زانوگریں مردماں دیمونی داتگ ءُ وتی راج چہ لٹ ءُ پل ءَ پھریز اتگ۔ پہ بلوچ ءِ ترسینگ ءَ چنچو بلوچانی آزار داتگیں لاش دزکپتگ، ھزارانی کچ ءَ بلوچ چیریں ادارھانی آزارجاھاں بندیگ اَنت ءُ آزارانی دیمپان اَنت۔
ماما کدیر گوشتگ کہ اگاں مردم میان استمانی جاوراں بہ چار ایت گڑا ھمے راستی پدر بیت جھان نزور ءُ زوراک ءِ جھد ءِ میان ءَ بھر ءُ بانگ اِنت۔ جھان ءِ تہ ءَ ھما راج گون شرپ ءَ وتی ڈیھ ءَ نشتگ کن اَنت کہ آ زوراکانی گون ءَ پرایمنیں جھد ءِ پارست ءَ دیم پہ دیمی کنگ ءَ اَنت۔ بلوچستان ءَ ھپتاد ءُ دو سال اِنت کہ پاکستانی لشکر ءُ آئی چیریں ادارھانی دست ءَ اِنت۔
