کیچ: 5 مئی 2024 ءَ بلوچ اسٹوڈنٹس ایکشن کمیٹی تربت ھنکین ءِ نیمگ ءَ ”بلوچ لٹریسی کیمپیئن (بی ایل سی)“ ءِ نام ءَ بلیدہ ءَ مراگشے برجم دارگ بوتگ مراگش 4 بھرانی تہ ءَ بُوتگ۔ مراگش ءِ بندات گوں راجی سوت ءَ کنگ بوتگ ءُ مھماندار ءَ مراگش دیم ءَ برتگ ءُ بساک ءُ بساک ءِ ارزشت ءِ بابت ءَ نودربرانی گون ءَ تران کرتگ۔
گشتانکی بھر ءَ آیاں بی ایل سی ءِ بابت ءَ تران کرتگ ءُ گوْشتگ کہ بلوچستان ءِ تہ ءَ وانگی جیڑہ ھمنچو باز اَنت کہ ھساب کنگ نہ بنت ءُ واکداریں ادارہ پہ اے جیڑھانی گیِش ءُ گیواری ءَ ھچ سر ءُ پر کنگ ءَ نہ اَنت ھمے درگت ءَ گل ءَ جیڑتگ کہ پہ بلوچستان ءِ وانگی جیڑھانی توجیل سازی ءَ ”بی ایل سی“ ءِ کیمپیئن جُنزینگ بہ بیت۔ اول سرا وانگی جیڑہ بلوچ مھلوک ءِ دیم ءَ آرگ بہ بنت ءُ پد ءَ سرجمین بلوچ راج پہ وتی راجی بودشت ءَ جھد بہ کنت ءُ وانگی جیڑھانی توجیل سازی ءِ جھد ءَ بہ کن اَنت۔
مراگش ءِ دیمتر ءِ بھر ڈیبلو بوتگ کہ آئی ءِ وسیلہ ءَ نودربرانی دیم ءَ وانگ ءِ ارزشت، بلوچستان کتاب کاروان ءِ ارزشت، ءُ پہ کسانیں چُکان گام ءِ ارزشت گشگ بوتگ۔
ڈیبیلو ءَ رند دیمتر ءِ بھر کئیر کائونسلنگ سیشن بوتگ کہ آئی تہ ءَ سنگت ءَ تران کناں ءُ گوشتگ کہ وھد ءِ لوٹ ھمیش اِنت بلوچ نودربراں وتارا ھمک جاہءَ سر کنگی انت ءُ دراھیں پیلڈانی وسیلہ ءَ بلوچ راج ءِ ھزمت کنگی اِنت۔
آئی دیمتر ءَ جتا جتائیں پیلڈ ءُ آھانی ارزشت ءِ سرا تران کرتگ۔ اے مراگش ءِ تہ ءَ کتاب مراگہ ھم مان بوتگ۔ بلیدہ ءِ نودربران پہ وتا جتا جتائیں کتاب زُرت۔
