![](https://zrumbesh.com/wp-content/uploads/2024/02/1000230895-1024x576.jpg)
نیشنل ڈیموکریٹک پارٹی ءِ بنجاھی جارکش ءَ وتی درشان ءَ گوشتگ کہ یک رندے پد ءَ ریاستی جھگیر بلوچ سرڈگار گوادر ءَ دو بھرانی تہ ءَ بھر ءُ بانگ کنگ ءِشوندات ءِ سر ءَ کارکنگ ءَ اَنت۔ لھتیں سال پیش ھمے شوندات ءِپارست ءَ گوادر ءَ ٹٹ کنگ ءِ رد ءَ دو بھرانی تہ ءَ بھر ءُ بانگ کرتگ ءُ بلوچ ءِ دریا ءِ جتا کنگ ءِ جھد کنگ بوتگ، ایشی بگیری ءَ بلوچاں تیوک ءَ ماھگیرانی ترندیں زھرشانیاں پد ھلاس کنگ بوتگ ءُ کمبہ دور دیگ بوتگ اَنت۔ چہ ایشی پیش نوک آبادکاریں شونداتانی رد ءَ زرباری بلوچستان ءِ نام ءَ استانے جوڑ کنگ ءِ واھشت پیش کنگ بوتگءُ بلوچستان ءِ بھر ءُ بانگ کنگ ءِ جھد کرتگ، اے ھرنیمگ ءَ ایر جنگ بوتگ۔
جارکش ءَ دیمتر ءَ گوشتگ کہ درسیں شوربندی بلوچستان ءِ مڈیانی لٹ ءُپل کنگ ءِ شوندات اَنت۔انچوش کہ برتانیہ ءَ ھندوستان ءِ مڈی لٹ ءُ پل کرتگ اَنت ءُ دیمروئی کنوکیں چاگردے ءَ ھوار کرتگ، بلکل ھمے وڑ ءَ ریکوڈک چیریں کولے ءَ بلوچ ءِ مڈیاں لیلام ءَ بھا کنگ، سی پیک کول ءِ نام ءَ بلوچستان بھا کرتگ ءُبلوچ سرڈگار ءِ مڈی، سھر، اشکر، گیس ءُ آدگہ مڈیاں لٹ ءُ پل کنگ ءُبلوچستان ءَ پدمنتگ لیکگ ءُ تیوک ءَ پنجاپ ءَ آباد کنگ ءُ مھکم کنگ ءَ اِنت۔ انچوش بلوچاں انگریز زورگر ءِ بگیری ءَ گھگیری کرتگ ءُکالونی جوڑ بوگ نہ من اتگ، اے رندی ھم ھما وڑ ءَ جتا کنگ ءِ اوست ھشکیں وابے بیت۔
جارکش ءَدرشان ءِ گڈی ءَ گوشتگ کہ گوادر ءَ ٹٹ کنگ ءِ کار زوت دارگ بہ بیت، اگاں نہ اے گپ تچک اِنت کہ نیشنل ڈیموکریٹک پارٹی بلوچ مڈیانی لٹ ءُ پل ءُ بلوچ سرڈگار ءِ بھر ءُ بانگ کنگ ءَ ھچ وڑ ءَ اوپار نہ کنت ءُ ھمک جاہ ءَ پہ بلوچ راجی پدریچ ءُ دودمان ءِ پھریزگ ءَ سیاسی جھد کنت ءُ توارچست کنت۔