شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5435 روچ سرجم بوتگ کہ انگت ءَ برجاہ اِنت۔ شمبے ءِ روچ ءَ پی ٹی ایم ءِ سروک آگاہ زبیر شاہ ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ ھمک روچ ءُ ماہ پہ ایردستیں راجاں یک وڑ ءَ گوز اَنت۔ ھمک روچ لاشانی چگل دیگ ءُ گسا نی چراگانی کشگ دودے جوڑ بوتگ۔ آدگہ ماھانی وڑ ءَ جنوری 2024 ءَ بگر داں اپریل ءَ لاشانی چگل دیگ، زوریں بیگواھی، کشندہ ٹولی ءِ نیمگ ءَ نشانگ ءُ شھید کنگ ءِ درچ برجاہ بوتگ۔
آئی ءَ گوشتگ کہ بلوچ ءُ اد ءَ آدگہ نزوریں راج پاکستان ءُ آئی کمکاریں زوراکانی نیمگ ءَ رستری زوراکی ءُ پندلانی آماچ کنگ بوتگ اَنت۔
ماما کدیر گوشتگ کہ رستری نزام ءَ بلوچ،سندی ءُ پشتونانی چکچینی ءَلشکری کاروائی، زوریں بیگواھی ءُ درکانودی ءِ رد ءَناھکیں کشت ءُ کوش زورگری ءِ برجاہ دارگ ءَ وتی درسیں زور چکاس اِتگ اَنت۔ ڈیرہ بگٹی، سبی، کیچ، پنجگور، ھاران، آواران، مشکے، ھزدار، کلات، سوراب، مستونگ ءُ بلوچستان ءِ آدگہ دمگاں بلوچ چکچینی ءُ لشکری کاروائی برجاہ اَنت۔
آئی گوشتگ کہ پکائیں ھالانی رد ءَ آھوکیں روچاں پہ یک مزنیں لشکرکشی یے ءَ چن ءُ لانچ کنگ ءَ اَنت۔ داں انوں ھمے جیڑگ ءَ اَنت کہ آ چہ کج ءَ بندات بہ کن اَنت۔
