ھزدار: 2013 ءَ چہ جھلاوان نادراھجاہ ھزدار ءَ زور بیگواہ کنگ بوتگیں ھاپز مھمد تیب ءِ زوریں بیگواھی ءِ بگیری ءَ کھول ءَنیمگ ءَ ھزدار ءَ زھرشانی روانکے کشگ بوگ ءَ اِنت۔
کھول ءِ گوشگ اِنت کہ ھاپز مھمد تیب 4 مئی 2013 ءَ چہ ھزدار ءِ جھلاوان نادراھجاہ ءَ آوار جنگ ءُ بیگواہ کنگ بوتگ، 4 مئی 2024ءَ آئی زوریں بیگواھی ءَ یازدہ سال سرجم بوگ ءَ اِنت کہ انگت ءَ آئی ھچ وڑیں ھال نیست، چہ آئی زوریں بیگواھی ءَ تیوگیں کھول سکا رنجانی دیمپان اِنت۔
آئی گوشگ اِنت کہ ما 4 مئی ءَ ھزدار ءَ چہ شھید رزاک چاراہ ءَ داں آزادی چاراہ ءَ زھرشانی روانکے کشگ ءَ ایں گوں ھزدار ءِ شرپمندیں مردماں لوٹ کن ایں کہ اے زھرشانی ءَ بھر بزور اَنت ءُ پہ ھاپز تیب ءِ آجوئی ءَ توار چست بہ کن اَنت۔
