![](https://zrumbesh.com/wp-content/uploads/2024/05/WhatsApp-Image-2024-05-02-at-03.15.29_81f8db07.jpg)
مشکے: بیگواھیں بلوچانی توار ( وی بی ایم پی ) ءِ کارگشاد ءُ زور بیگواھیں ڈاکٹردین مھمد ءِ جنک سمی دین ءَ مشکے ءَ پاکستانی لشکر ءِ زوراکیانی پژدر ءَ وتی تامربندے شنگ کرتگ ءُ گوشتگ کہ مشکے ءِ ھند تنک ءَ ماھے ءَ پیش پاکستانی لشکر ءِ پانگس ءِ سر ءَ ارشے بوتگ، چہ ارش ءَ پدا ود ءِ جاہ منند ایں مردم سکا سانمند اَنت ءُ گوں جنجالان زند گوازینگ ءَ اَنت۔اود ءِ مردم پہ وتی جاہ ءُ روزگار ءِ یل کنگ ءَ لاچار اَنت۔
آئی گوشتگ کہ اود ءِ درسیں مردماں پاکستانی لشکر یکجاہ کنت ءُ وتی بنجلاں بارت ءُ اود ءَ آیاں ایردستانی وڑ ءَ کار گیت۔ اود ءَ آیاں دگ ءِ ساپ کنگ ءُ درچک ءِ برگ ءَ پرماھگ ءَ اِنت۔ وھدے کہ اود ءَ لشکر پہ ترءُ گردے ءَ روت گڑا درسیں مردماں وتی گون ءَ ھواری ءَ بارت۔ ھمے گوش ایت کہ اگاں مئے سر ءَ ارش بوت گڑ ا شما ھم سانمند بہ بہ اِت۔ گوستگیں یک ماھے بیت تنک ءَ پابندی جنگ بوتگ ھندی مردماں نہ تر ءُ گرد کنگ ءِ موکل ھست، نہ آیان ءَ وتی ڈگارانی سر ءَ روگ ءُ کشارانی چارگ ءِ موکل ھست، ماھے بیت کہ آیانی کشار تباہ بوگ ءُ کشت ءُکشاری ءَ دارگ بوگ ءَ اَنت ، اود ءِ جنین ءُ زھگ شد ءَ مرگ ءَ اَنت۔
سمی دین ءَ گوشتگ کہ اے ارش ءَ پد سے ورنا زور بیگواہ کنگ بوتگ، آیانی تہ ءَ دو اپریل ءَ سجاد آز م ءُ ولی جان زور بیگواہ کنگ بوتگ اَنت۔ رند ءَ 26 اپریل ءَ ھاسل ء مھمد ھسن ءَ بنجل ءَ لوٹاھینتگ ءُ بیگواہ کرتگ۔ رند ءَ ھمے گوشگ بوتگ کہ ھاسل مئے بنجل ءَ نہ اِنت۔ اود ءَ جنین سے روچ اِنت کہ یکشل ءَ زھرشانی کنگ ءُ روانک کشگ ءَ اَنت، اود ءَ نہ دامگ ءُ نہ دگہ آسراتی ھست چہ ایشی ءَ ابید آ اود ءَ زھرشانی کنگ ءَ اَنت۔ ھمے لوٹ ءَ کنگ ءَ اَنت کہ ریاستی زوراکیانی درگت ءَ پما توار چست بہ کن اِت ءُ پہ زور بیگواھیں مردمانی آجوئی ءَ توار چست کنگ ءَ وتی کرد ءَ پیلو بہ کن اِت۔
آئی گوشتگ کہ اود ءَ زھرشانی کنوکیں مردم کشندہ ٹولی ءِ نیمگ ءَ ترسینگ بوتگ اَنت چہ بازیں جنجالاں پد اے جنینانی تامر پما سر بوتگ اَنت۔ ما گوں درسیں مردماں لوٹ کناں کہ ھمے مات ءُ گھارانی توار جوڑ بہ بنتءُ ریاستی زوراکیانی بگیری ءَ آیاں کمک بہ کن اَنت۔