آواران: پاری نومبر ءَ چہ پیراندر آواران ءَ زورگریں پاکستانی لشکر ءِ دست ءَ زور بیگواہ کنگ بوتگیں ورنا اکتر ء ساھبداد ءِ کھول ءَ پہ آئی آجوئی ءَ توار چست کنگ ءِ لوٹ کرتگ۔
کھول ءِ گوشگ اِنت کہ اکتر ء ساھبداد لوپ پیراندر ءِ جاہ منند اِنت کہ 29 نومبر 2023 ءِ شپ ءَ پاکستانی لشکر ءُ چیریں ادارھانی کارمنداں میردوست بازار پیراندر ءَ بیڑ برتگ ءُ آوار جتگ ءُ بیگواہ کرتگ کہ انگت بیگواہ اِنت۔
کھول ءَ گوشتگ کہ اکتر ءِ زوریں بیگواھی ءَ پنچ ماہ گوستگ انگت ءَ مارا آئی بارو ا ھچ وڑیں سرپدی دیگ نہ بوتگ کہ چون ءُ کج ءَ اِنت۔ چہ اکتر ءِ زوریں بیگواھی ءَمئے تیوگیں کھول سکس رنجانی دیمپان اِنت۔
زور بیگواھیں اکتر ساھبداد ءِ کھول ءَ گوں بلوچ راج ءُ مردمی ھکانی ادارھاں لوٹ کرتگ کہ پہ اکتر ءِ آجوئی ءَ توار چست بہ کن اِت۔
