لاھور: آسمہ جھانگیر کانپرنس ءَ ڈاکٹر ماہ رنگ ءَ تران کرتگ ءُ گوشتگ کہ مئے زرمبشت ءَ پہ زانت ءُ سما پنجاپ ءِ بگیری ءَ شکی کنگ ءِ پندل ءَ سازگ ءَ اَنت دانکہ مئے توار شکی بہ بیت ءُ نزوریں راجانی ھمدردی اچما دور بہ بیت۔ ما مدام رد ءَ را رد گوشتگ۔ بلوچستان ءَ زوراکی لٹ شاپ ءُ مردمی ھک ناگیگیں وڑے ءَ لپاشگ بوگ ءَ اَنت بلے اے ادارھاں آمیدگس ءُ پارلیمنٹ ءِ پلہ مرزی گوں اِنت۔
ڈاکٹر ماہ رنگ ءَ گوشتگ کہ بلوچستان ءَ مردمی ھکانی پادمالی ءِ بگیری ءَ توار چست کنوکیں جنین زوراکیانی نشانگ کنگ بنت، کشندہ ٹولی ءِ رد ءَ بیھار دیگ ءُ ترسینگ بنت یا ھما جنینانی زور بیگواہ کنگ ءِ جھد کنگ بیت چہ آیانی گساں مرد سلاہ بندیں گھگیری ءِ بھر اَنت۔ بلوچ جنین ھما جنجالانی دیم پہ دیمی ءَ کنگ ءَ اَنت کہ آیانی لاھور ءُ آدگہ جاھاں نشتگیں مردم گمان کرت ھم نہ کن اَنت۔ مئے ماتانی زھگ ھما جاوراں گوں دیم دیگ بنت کہ چہ بازیں آزاراں آیانی چھرگ زانگ نہ بنت آیانی مات پہ پجارگ ءَ ھیران بنت۔
آئی ءَ گوشتگ کہ جھانی دومی مزنیں جنگ ءَ داں کالونیل ءَ جنینانی گون ءَ زوراکی کنگ بوتگ، مرچی ھم بلوچستان ءَ جنین زوریں بیگواھیانی سوب ءَ مچی سزا ءِ نشانگ بوگ ءَ اِنت۔ بلوچستان ءَ چہ دو دھکاں زوراکی برجاہ اِنت، اے وھد ءَ گیشتر جنین زوراکیانی آماچ اَنت۔ چہ دھکاں پہ وتی آزیزانی ودار ءَ بلوچ جنین سسائی ءُ جانی آزارانی دیمپان اَنت۔ مردمی ھکانی ادارہ مدام بے توار اَنت ءُ بلوچستان ءَ زوراکیانی درچ برجاہ اِنت۔ لٹ شاپ، زوراکی ءُ زور بیگواھیں مردمانی پیم ءَ مرچی ھم بلوچستان گوں چکچینی ءِ گنتریں جاوراں گوزگ ءَ اِنت۔ اے بارو ءَ آمیدگس ءُ پارلیمنٹ بے توار اَنت ءُ میارباری ءَ شریدار اَنت۔ چہ دھکاں مئے مردم زوراکیانی آماچ اَنت آیاں وشھالیں زندمان بے ھال کرتگ۔
ڈاکٹر ماہ رنگ ءَ گوشتگ کہ بلوچستان ءَ زوراکیانی بگیری ءَ توار چست کنوکیں ٹیچر، اھوالکار ءُ زانوگریں مردم ھم سسائی زوراکیانی نشانگ بوتگ اَنت، چہ سھر ودی کنوکیں مئے سرڈگار ءَ لاش دزکپگ ءَ اَنت، وھدے کہ ما ایشی ءِ بگیری ءَ ایمنیں زرمبشت بندات کن ایں گڑا مارا پنجاپ دژمن لیک ءِ جھد ءَ کن اَنت دانکہ گوں نزوریں راجاں مئے ھمدردی ھلاس بہ بیت ءُ بلوچ ایوک کنگ بہ بنت ءُ گوں آیاں زوراکی کنگ ءَ ارزاں بہ بیت۔
آئی ءَ گوشتگ کہ بلوچستان ءَ زوریں بیگواھی کھر جوڑ بوتگ ءُ مئے سر ءَ دور دیگ بوتگ، چہ ایشی مئے تیوگیں چاگرد سانمند اِنت۔ مئے جنین کشندہ ٹولی ءِ پارست ءَ ترسینگ بنت۔ سلاہ بندیں گھگیری ءَ ھواریں گسانی جنینانی ترسینگ ءِ ھواری ءَ کسانیں زھگ کشندہ ٹولی ءِ کارمندانی دست ءَ پہ زور سور دیگ ءَ لاچار کنگ بنت، چہ ایشی ءَ وتکشی ءِ کیس ھم گیش بوگ ءَ اَنت۔
ڈاکٹر ماہ رنگ ءَ گوشتگ کہ بلوچستان ءِ جیڑہ اے وھد ءَ گیش ءُ گیوار کنگ ءِ وڑ ءَ نہ اِنت، دانکہ زوریں بیگواھی میاباری یے لیکگ مہ بیت۔
