بلوچ یکجھتی کمیٹی ءِ جارکش ءَ وتی شنگ کرتگیں درشانے ءَ گوشتگ کہ زور بیگواھیں نئیم رھمت ءِ کھول گوستگیں چنچو روچ اِنت کہ شاپک ءَ زھرشانی ءَ نشتگ اَنت، ھمک رند ءِ وڑ ءَ اے رندی ھم ریاست ناھکیں وڑے ءَ کار کنگ ءَ اِنت۔ یک نیمگے ءَ وتی آزیزانی زوریں بیگواھی ءِ رنج ءُ دومی نیمگ ءَ پہ آیانی آجوئی ءَ دگانی سر ءَ آزار اوپار کنگ یک جتائیں دردے۔ ریاست اے درکانودی ءُ بے راھبندیں درچ ءَ زوتاں چہ زوت بند بہ کنت۔ چہ ھمے ریاستی زوراکی ءُ درکانودی کارانی سوب ءَ بلوچ مات ءُ گھار ھمک روچ دگانی سر ءَ در کپ اَنت۔ اود ءَ آیاں ریاستی ادارھانی نیمگ ءَ گوں جتائیں بنشوناں زوراکیانی آماچ کن اَنت۔ دوشی سادگ پوشاکیں لھتیں مردماں نندانک ءَ نشتگیں مردم گوں گاڑیاں لگت داتگ اَنت، ھمے سوب ءَ سبگت اللہ ءَ ھوار نندانک ءَ ساڑی ئیں جنین ٹپی بوتگ اَنت۔ پہ نندانک ءِ پروش دیگ ءَ مدام انچیں مردم دیم دیگ بوگ ءَ اِنت کہ گوں جتائیں وڑے ءَ برے نندانک ءَ نشتگیں مردماں گاڑی ءِ سر ءَ لگت دے اَنت ءُ برے دگہ وڑے ءَ نندانک ءَ نشتگیں مردماں گوں جتائیں وڑ ءُ پیماں ترسینگ ءِ جھد ءَ کن اَنت۔
آئی ءَ گوشتگ کہ ما ریاست ءُ آئی ادارھان ءَ ھمے کلوہ ءَ دے ایں کہ نندانک ءَ نشتگیں مردمانی پھازداری ریاست ءِ زمہ واری بیت ءُ اے نندانک ءِ لوٹانی منگ ءُ آیانی آزیزانی آجوئی ھم ریاست ءِ زمہ واری بیت۔ اگاں اے وڑیں دگہ ویلے بہ بیت گڑا ما ایشی بگیری ءَ شریں وڑے ءَ گامگیج زور ایں ایشی درسیں زمہ واری ریاست ءِ سر ءَ بنت۔
آئی ءَ گوشتگ کہ کیچ ءَ ھوار تیوگیں بلوچستان ءِ مردمانی گون ءَ لوٹ کن ایں کہ آ زوریں بیگواھیانی بگیری ءَ بیوکیں زھرشانیاں کھولاں کمک بہ کن اَنت۔ کیچ ءِ مردمانی گون ءَ لوٹ کن ایں کہ آ زوت نندانک جاہ ءَ سر بہ بنت گوں جتائیں وڑ ءُ پیماں زھرشانی ءَ کمک بہ کن اَنت۔ ھمے وڑ ءَ کھول نادراھیں مردم ءُ آدگہ جنجالیں روکیں گاڑیاں چہ پیسر ءَ موکل دیگ ءَ اَنت ھمے وڑ ءَ اے برجاہ بیت۔ اے لّس مردمانی لوٹانی بنیاد ءَ زھرشانی اِنت اد ءَ لّس مردمانی یکے دومی ءِ کمک جوڑ بوگ ھژدری اِنت۔
