شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5428 روچ سرجم بوتگ کہ انگت برجاہ اِنت۔ شمبے ءِ روچ ءَ نیشنل پارٹی ءِ بنجاھی پتر ءِ باسک ملک نسیر شاھوانی، چہ نوشکے ءَ نودربر ءُ نزیر پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ جھان ءَ زورگراں پہ لّس مردمانی جھد ءِ دارگ ءَ کشندہ ٹولی جوڑ کرتگ ءُ نزوریں راجانی کشت ءُ کوش کرتگ، ھندی چاریگ ءُ ناشرکار نزوریں راجانی بگیری ءَ کارمرز کرتگ اَنت۔ پاکستان ھم وتی زورگپتی ءِ برجاہ دارگ ءَ بلوچ چکچینی کنگ ءَ اِنت۔ ھندی چاریگ ءُ نشہ ءِ کاچاکاں ھوار درسیں ناشرکاراں یکجاہ کنگ ءُ بلوچستان ءَ چکچینی کنگ ءَ اِنت۔
آئی ءَ گوشتگ کہ ریاست پہ بلوچ راجی جنز ءِ دارگ ءَ بنگلہ دیش ءِ وڑ ءَ زوراکی کنگ ءَ اِنت۔ ھما وڑ ءَ ریاست ءَ بنگلہ دیش ءَ زوراکی کرتگ جھد داشت نہ کرتگ بلوچ ءِ جھد دیم پہ وتی منزل ءَ جنزگ ءَ اِنت۔
ماما کدیر گوشتگ کہ ھزدار ءَ بلوچ چکچینی کشندہ ٹولی ءِ ناشرکاریانی درچ اِنت۔ کشندہ ٹولی ھزدار ءَ ھوار تیوگیں بلوچستان ءَ ناشرکاری کنگ ءَ اِنت۔ چہ ایشی پیش کشندہ ٹولی ءَ شھیدانی کھول زھگ، کماش جنینانی گون ءَ زوراکی کرتگ۔
