شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5425 ءَ روچ سرجم بوتگ کہ انگت برجاہ اِنت۔ چارشمبے ءِ روچ ءَ چہ سبی ءَ سیاسی ءُ چاگردی کارکن مولا داد، نبی بکش، امر ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ شھیدانی دیمونیانی سوب ءَ بلوچ ءِ ھمک زھگ سرپد اِنت ءُ ھمک گس ءَ راجی زرمبشت ءِ گپ بوگ ءَ اِنت۔ نوں اگاں دژمنیں ریاست یک روچے ءَ بلوچ پسگانی ھزار لاش چگل بہ دنت بلے بلوچ چہ جنگ ءَ پدکنز نہ بیت۔
ماما کدیر گوشتگ کہ چہ شھیدانی دیمونیانی سوب ءَ مردمانی توکل مھکم اِنت ءُ کینگداری گیش بوگ ءَ اِنت۔ اگاں دژمن مئے یک ورنایے شھید کنت گڑا آئی بیر ءِ گرگ ءَ ھزارانی کچ ءَ ورنا پہ دژمن ءَ مرگ جوڑ بیت ءُ پاد کیت۔ شھیدانی کاروان جنزاں اِنت۔ اگاں تو یک جلیل ریکی یے شھید کن ئے گڑا ورنا کمبر چاکر، سنگت سنا، گپار لانگو بنت ءُ پاد کاینت۔ چہ بالاچ ءِ شھیدی ءَ ھمک گس ءَ بالاچ پاد کیت راجی زرمبشت ءَ کس داشت نہ کنت۔
آئی ءَ گوشتگ کہ اگاں مرچی بلوچستان ءِ جاوراں چار ئے گڑا مارا بلوچ راج ءِ سوبمندی گندگ ءَ کیت۔ امریکہ ءِ ڈالرانی ایردست مارا سیاسی جھدکاراں برے انڈیا، برے را ءُ برے ناشرکار لیکگ ءُ کُشگ ءَ اَنت۔ پہ میان استمان ءِ رد دیگ ءَ مارا کشگ ءُ ھندوستان ءِ کارمند لیکگ ءَ اَنت۔
