بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں کیچ ءِ ھند کولواہ ءَ زورگریں پاکستانی لشکر جتائیں اُرشاں نشانگ کرتگ، اے اِرشاں یک دژمنیں کارمندے مرتگ ءُ یک سرویلنس ڈرونے تباہ بوتگ۔
آئی ءَ گوشتگ کہ بی ایل اے ءِ سرمچاراں مرچی سھب ءَ کولواہ ءِ ھند مراستان ءَ سنگر گپتگ ءُ زورگریں پاکستانی لشکر ءِ یک کاروانے ھما وھد ءَ نشانگ کرتگ کہ آ ھمے ھند ءَ ترّ ءُ گرد ءَ بوتگ۔ دُژمنیں لشکر ءِ یک بکتربند گاڑی یے اُرش ءِ زد ءَ آتکگ آ سرمچاراں گوں راکٹ، اسنائپر ءُ آدگہ سلاھاں نشانگ کرتگ۔
جارکش ءَ گوشتگ کہ ھمے میان ءَ دژمنیں لشکر ءَ سرویلنس ڈرون کارمرز کرتگ، آ سرمچاراں نشانگ کرتگ ءُ تباہ کرتگ۔
آئی ءَ گوشتگ کہ ھمے وڑ ءَ سرمچارانی دگہ ٹولی یے ءَ ھمے جاہ ءَ دژمنیں لشکر ءِ یک پانگسے ءِ سر ءَ گوں وتکاریں سلاھاں اُرش کرتگ اُرش ءِ آسر ءَ کم چہ کم یک کارمندے جاھی مرتگ۔
بی ایل اے ءِ جارکش جیھند ءَ اُرشانی زمہ واری منّ اتگ ءُ گوشتگ کہ داں زورگریں پاکستانی لشکر ءِ چہ بلوچستان ءَ سرجم ءَ در آھگ ءَ مئے اُرش برجاہ بنت۔
