کیچ: چہ تربت ءِ بازار ءَ زورگریں پاکستانی لشکر ءِ دست ءَ زور بیگواہ کنگ بوتگیں ورنا نئیم رھمت ءِ کھول ءِ نیمگ ءَ شاپک ءَ سی پیک دگ ءَ زھرشانی برجاہ اِنت۔
چہ زھرشانی نندانک ءَ کھول ءِ گوشگ اِنت کہ نئیم رھمت 2 مارچ 2022 ءَ تربت بازار ءَ امان اللہ آٹوز ءَ آوار جنگ بوتگ۔ ما پیسر ءَ ھم پہ نئیم رھمت ءِ آجوئی ءَ شاپک ءَ سی پیک دگ ءَ زھرشانی کرتگ ءُ نشتگ ایں بلے دمگدار ءِ جند مئے کِر ءَ نہ یتکگ آئی کلوہ کرتگ کہ دگ ءَ پچ بہ کن اِت ءُ من ءَ پنچ روچ ءِ وھد بہ دے اِت۔
آئی ءَ گوشتگ کہ ما دمگدار ءِ شرپ کرتگ ءُ پہ آئی کلوہ ءَ دگ پچ کرتگ، دمگدار ھسین مارا وتی کارگس ءَ لوٹاھینتگ بلے وت مئے کِر ءَ نہ یتکگ۔
کھول ءَ گوشتگ کہ ما ھمے لوٹ ایں مرچی دمگدار وت بیت ءُ مئے گون ءَ گپ ءُ تران بہ کنت ءُ نئیم رھمت ءَ بیار ایت مئے دست ءَ بہ دنت۔
آئی ءَ گوں کِر ءُ کشانی ھند شاپک، شھرک، کیساک ءُ سامی ءِ مردمانی گون ءَ دزبندی کرتگ ءُ گوشتگ کہ بیا اَنت ءُ مئے گون ءَ ھمراھداری بہ کن اَنت۔
