آواران: گوستگیں بیست روچ اِنت کہ مشکے ءَ زورگریں پاکستانی لشکر ءِ زوراکی یکشل ءَ برجاہ اَنت۔
اھوالکار ءِ رد ءَ زورگریں پاکستانی لشکر ءَ بیست روچ بیت کہ مشکے تنک ءُ بنڈکی ءِ کِر ءُ کشاں ھکیم بازار، گمشاد بازار، رشید بازار، کریم بکش بازار، لال جان بازار، وشی گوٹ، جلال گوٹ، ابدرھیم گوٹ، گپور گوٹ، اوگار ءُ داں ملشبند ءَ مردمانی گون ءَ زوراکی کنگ ءُ کار گرگ ءَ اِنت۔
ھندی بنشونے ءِ رد ءَ یک اپریل ءَ تنک شردوئی ءَ پاکستانی لشکر ءِ سر ءَ بوتگیں اُرش ءَ پد ھمک روچ زورگریں لشکر ھندی مردماں لوٹاھینگ ءُ دگ ءِ پھنات ءَ درچکانی گڈگ ءَ پرماھگ ءَ اِنت۔
کجام روچ ءَ لشکر پہ ترّ ءُ گردے ءَ درکپ ایت گڑا مردماں زور ایت پیسر ءَ راہ ءِ چارگ ءَ دیم دیاں کنت۔ چہ پاکستانی لشکر ءِ زوراکیاں مردم سکا دلسیاہ اَنت۔
مردمانی گوشگ اِنت کہ مئے کار ءُ روزگار کشت ءُ کشاری ءُ مالداری اِنت لشکر مارا دگہ کار ءَ نیل ایت ھمک روچ پہ وت کار گرگ ءَ اِنت۔
یات بہ بہ اِت کہ تنک شردوئی ءَ پاکستانی لشکر ءِ سر ءَ بوتگیں اُرش ءِ زمہ واری بلوچستان آجوئی سنگر ( بی ایل ایپ ) ءَ من اِتگ۔
جارکش میجر گھرام ءَ گوشتگ کہ سرمچاراں مشکے ءِ تنک ءَ پاکستانی لشکر ءِ سر ءَ دو اُرش کُرتگ۔ پیسر ءَ پیادگیں ٹولی گوں شورھاں نشانگ کُرتگ ءُ پد ءَ آیانی کمک ءَ اتکگیں کارمندانی سر ءَ سنگر گِپتگ ءُ نشانگ کُرتگ اَنت۔ بمب تراک ءِ آسر ءَ دو کارمند مُرتگ ءُ یکے ٹپی بیتگ۔ایشانی کمک ءَ اتکگیں کاروان ءِ سر ءَ سرمچاراں چہ نزیک ءَ اُرش کُرتگ کہ یک کارمندے مرتگ ءُ دو ٹپی بیتگ۔
چہ ایشی پیش ھم مشکے تنک ءِ کِر ءُ کشاں زورگریں پاکستانی لشکر ءِ دراجکشیں زوراکی برجاہ بوتگ اَنت۔ لشکر ءِ زوراکیانی بارو ءَ باز رند ءَ زرمبش ءَ گزارش شنگ کرتگ اَنت۔
