شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5421 روچ سرجم بوتگ۔ شمبے ءِ روچ ءَ چہ پنجگور ءَ سیاسی ءُ چاگردی کارکن رھمت اللہ، نزیر، زبیر، پدا ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءِ جتائیں ھنداں زورگریں لشکر ءِ دست ءَ بلوچ چکچینی ءُ زوراکی گوں ترندی ءَ برجاہ اِنت۔ گوستگیں روچ ءَ زورگریں لشکر ءَ گسانی سر ءَ اُرش کرتگ ءُ جنین ءُ زھگ سکا لٹ شاپ کرتگ اَنت۔
آئی گوشتگ کہ پاکستانی لشکر بلوچ آبادیانی سر ءَ اُرش کنگ ءُ بلوچ ورنایاں آوار جنگ ءَ اِنت۔ بلے زوراکیانی تیز کنگ ءَ بلوچ راجی زرمبشت ءَ نزور کرت نہ کنت۔ ما وتی شھیدانی دیمونیاں گیر کار ایں ءُ آیانی لیکہ ءِ رندگیری ءَ کن ایں وتی راجی زرمبشت ءَ وشیں باندات ءِ نیمگ ءَ بر ایں ءُ لوٹاں پیلو کن ایں۔
ماما کدیر گوشتگ کہ بلوچ راج ءِ باسمائیں پسگاں ایردستی ءِ ھمک دور ءَ پہ وتی راجی پجار، پدریچ ءِ رکینگ ءَ زورگر ءِ زوراکیانی دیم پہ دیمی کرتگ ءُ وتی جھد برجاہ داشتگ۔ وتی لیکہ ءِ سر ءَ اوشتاتگ اَنت ءُ دُژمن ءِ آزار اش اوپار کرتگ اَنت۔
آئی ءَ گوشتگ کہ پہ راجی پدریچ ءَ داں گڈی ساہ ءَ وتی جھد ءَ برجاہ دار ایں ءُ وتی جانانی دیمونی ءَ دیں کہ ھرزارانی کچ ءَ شھیداں جھد ءِ راہ ءَ بے مٹیں دیمونی داتگ مئے ھم سر ءَ پرز بیت کہ گوں راجی زرمبشت ءَ زورگر ءِ دیم پہ دیمی ءَ بہ کن ایں۔
ماماکدیر گوشتگ کہ بلوچ راج ءِ نہ ترس ءُ وتن دوستیں پسگاں ھمک وھد ءَ زوراکی ءُ زورگری ءِ بگیری ءَ پہ وتی سرڈگار، بلوچی ءُ پدریچ ءَ سرانی دیمونی داتگ راجی گوستانک ءَ ابدمان اَنت ءُ ھما دیمونی پہ بلوچ پسگاں مادنیں راہ اَنت۔
