کراچی: مانسہرہ کالونی ءَ درآمدیں مردمانی گاڑی ءِ سر ءَ وتکش اُرشے بوتگ، دو مردم مرتگ ءُ دو کارمند ٹپی بوتگ۔
کراچی پولیس ءِ گوشگ اِنت کہ کاسم پورٹ ءَ کار کنوکیں مردمانی گاڑی نشانگ کنگ بوتگ۔ اے گاڑی ءِ پشت ءَ یک وتکش ارشکارے بوتگ کہ آ پرپٹے ءَ سوار بوتگ۔
آئی گوشگ اِنت کہ اُرش جاہ ءَ یک ایس ایم جی ( شارٹ مشین گن) ءُ دستی بمب ءِ بیگے دستیگ کنگ بوتگ۔
پولیس ءِ گوشگ اِنت کہ اے اولی وتکش اُرش بوتگ چہ ایشی ءَ پد تیرگواری بوتگ ءُ ھمے میان ءَ دستی بمبے ھم چگل دیگ بوتگ۔
آئی گوشگ اِنت کہ اُرش ءَ نشانگ بوتگیں وین ءَ پنچ درآمدیں مردم سوار بوتگ اَنت۔
پولیس ءَ دیمتر ءَ گوشتگ کہ اُرش ءِ آسر ءَ دو درآمدیں مردم مرتگ ءُ پہ آیانی پھازداری ءَ ساڑی ئیں دو کارمند ٹپی بوتگ اَنت۔ ٹپی بوتگیں کارمند پہ درمان کنگ ءَ نادراھجاہ ءَ برگ بوتگ اَنت۔
