کیچ: پاکستانی لشکر ءِ دست ءَ زور بیگواہ کنگ بوتگیں نئیم رھمت ءِ کھول ءِ نیمگ ءَ برجاھیں زھرشانی نندانک گوں واکدار ءَ گپ ءُ تران ءَ پد داں شش روچ ءَ ھلاس کنگ بوتگ۔
دوشی زھرشانی نندانک ءَ واکدار ءَ گوں کھول ءَ گوشتگ کہ مارا پنچ روچ ءِ وھد بہ دے اِت ما پہ نئیم رھمت ءِ بارو ءَ جست ءُ پرس کن ایں شمارا دلجمیں ھالے دے ایں۔
زور بیگواھیں نئیم رھمت ءِ کھول ءَ آیانی گپ منّ اتگ ءُ گوشتگ کہ ما داں پنچ روچ ءَ ودار کن ایں اگاں مئے زھگ یل کنگ نہ بوت ما ششمی روچ ءَ پد ءَ وتی زھرشانی ءَ بندات کن ایں۔
آئی ءِ گوشتگ اِنت کہ نئیم رھمت 17 مارچ 2022 ءَ چہ امان آٹوز تربت ءَ آوار جنگ ءُ بیگواہ کنگ بوتگ۔ چہ آئی زوریں بیگواھی ءَ پد ما پیسر ءَ ھم دو جاہ ءَ ڈی بلوچ ءُ دمگدار ءِ کارگس ءِ دیم ءَ زھرشانی ءَ نشتگ ایں۔
یات بہ بہ اِت کہ اے زھرشانی نندانک شاپک ءَ آئید ءِ بنداتی روچ ءَ بندات کنگ بوتگ ءُ چار روچاں برجاہ بوگ ءَ پد دوشی ھلاس کنگ بوتگ۔
