بلوچ راجی زرمبشت ( بی این ایم ) شھید سلیمان آرگنائزنگ باڈی تربت ءِ نیمگ ءَ مرگاپ ءِ شھیدانی یات ءَ دیوانے برجم دارگ بوتگ، اے دیوان ءِ جارچن چیدگ بوتگ ءُ اے دیوان ءَ بی این ایم ءِ بنجاھی کستریں کمک سرکماش بابُل لتیپ ءُ شھید سلیمان آرگنائزنگ باڑی ءِ دپٹی آرگنائزر گلزمین ءَ تران کرتگ۔
چیدگ ءَ دیوان ءِ بندات ءَ تران کرتگ ءُ گوشتگ کہ ایردستی ءِ زند بدڈول اِنت، بدڈولیں زند ءِ بگیری ءَ راجی گھگیری کنگی اِنت۔ ھمے راجی گھگیری ءِ پلگاریں راہ ءِ شون ءَ لھتیں گیچینیں مردم وتی لس مھلوک ءَ راجی باندات ءِ ڈولداری ءُ نوکیں آشوبے ءِ درونت ءَ دے اَنت۔ پمیشکا مرگاپ پہ ما زیارتے ءِ بستار ءَ دار ایت کہ آ جاگاہ ءَ مئے سیاسی راھشون ءُ بازیں راجی شھیدانی ھونانی نشان پہ دائمی نکش اَنت۔
آئی ءَ گوشتگ کہ 3 اپریل 2009 ءَ چیئرمین گلام مھمد، لالا منیر ءُ شیر مھمد پاکستانی لشکر ءِ دست ءَ آورجنگ بہ اَنت ءُ ششمی روچ ءَ آیانی تیر سُپتگیں لاش مرگاپ ءَ دست کپ اَنت۔ اے ویل ءَ پاکستان پہ وت سوبے سرپد بیت کہ بلوچ ءِ راستیں راھشون نوں زندگ نہ مان اَنت ، بلے گلام مھمد ءَ وتی زند ءَ لھتیں پلگاریں راہ گیشنت ءُ دات کہ دائمی بلوچ ءِ راھشونی کن اَنت۔ اے تھنا یک سیاسی بیانیایے نہ اَنت ، بلکیں آئی ءِ راستی مروچگیں جنگ ءِ تہ ءَ گندگ بہ اَنت۔ اگاں مروچی پلگاریں اسٹوڈنس پولیکٹکس یا ماس پولیٹکس گلام مھمد ءِ لیکہ ءِ پاسدار انت ءُ لس مھلوک گلام مھمد ءِ ھما گوانک ءِ پاسدار انت کہ "مارا وتئی راجی سرمچارانی ھمراھی کنگی انت” گڑا من سرپد باں دژمن بے سوب ءُ گلام مھمد ءِ لیکہ سوب مندی ءِ نیمگءُ جنزگءَ اِنت۔
استاد بابل لتیپ ءَ تران کنان گوشتگ کہ گلام مھمد، لالا منیر ءُ شیر مھمد گونگیں گوھریں سرانی سپت ءُ ستاہ ھما وھد ءَ برجم بیت کہ ما آیانی راجی زمہ داری ءِ زورگ ءَ ساڑی بہ این ءُ آیانی پیش داشتگیں راہ ءِ راھی بوگ ءَ سوب مند بہ ایں. دگینا ءَ چوشیں سلاہ یے جوڑ نہ بوتگ کہ راجی لیکہ ءَ پروش بہ دانت، ءُ شھیدانی زندمان شھیدی ءَ رند بندات بیت. پانزدہ سال ءَ رند مرگاپ ءِ شھیدانی لیکہ گوں مھکمی ءَ دیم ءَ جنزان اِنت. گلام مھمد ءِ رتکگیں ھون ھمے شون ءَ دنت کہ راجی آکبت ءِ راہ ھمیش اِنت، پرچا کہ گلام مھمد ءِ لیکہ ایرستیں راج ء ڈیھ ءِ آجو کنگ بوتگ۔
آئی ءَ گوشتگ کہ گلام مھمد ءَ پد ھم دژمن ءَ آئی ءِ کاروان ءِ سنگت سلیمان ءِ رنگیں سنگت، ساجد ھسین، سمد تگرانی، رزاک گل ءُ سدانی کچ ءَ راجی جھدکار شھید کرتگ اَنت، شھید سلیمان مئے مرچیگیں دیوان ءِ سنگتانی بامرد اِنت، چی ءَ کہ سلیمان گلام مھمد ءِ لیکہ ءِ پاسدار بیت ءُ دژمن ءِ تیراں وتی سینگ ءَ جاگہ دنت۔
استاد بابل لتیپ ءَ گوشتگ کہ مرچی ھرچ باسکے وتی بالاد ءَ گلام مھمد ءِ سیاسی بالاد ءِ وڑ ءَ رودینگ ءِ جھد بہ کنت کہ پہ آجوئی ءَ دراجکشیں پند جنگی اِنت۔ سیاسی باسک ایردستیں چاگرد ءِ ھما ڈاکٹرز اَنت کہ چاگرد ءَ کالونائزر ءِ بکش اتگیں نادْرھی ءِ الاج ءَ کن اَنت ءُ سیاسی موبلائیشن ءَ برجم دار اَنت. مئے زمہ داری تھنا یک روچے ءِ دیوان ءُ روانکے ءَ ساڑی بوگ نہ انت ، بلکیں ھمک روچ راجی جھد ءِ لوٹانی پیلو کنگ ءَ جھد کنگی اِنت۔
گلزمین ءَ تران کرتگ ءُ گوشتگ کہ ھون، دیمونی ، جھد اے سھیں زور گوشگ بہ اَنت۔ واجہ گلام مھمد ءِ دیمونی ، ھون، جھد پہ بلوچ راج ءَ مزنیں راجدپتری زورے کہ بلوچ ءُ بلوچ ءِ راجی زرمبشت ءَ را مھکم کرتگ ءُ آئی ءِ اسل رو ءَ را زندگ داشتگ۔
بلوچ ڈیھ ءَ ھر وھد ءُ دور ءَ چہ دری زوراکانی چم سک اَنت۔ بلوچ زمین مال ءُ مڈّی ءَ چکار ، جیوسٹریٹجک ءُ جیو پولیٹکس ارزشت ءِ سبب ءَ بلوچ ءِ زمین ءِ سر ءَ کولونائزر ءُ دری زوراکانی چم سک اَنت۔
آئی ءَ گوشتگ کہ 27 مارچ 1948 ءَ وھدے پاکستان بلوچستان ءِ سر ءَ زورگپت بیت ، بلوچ پہ وتی آجوئی ءِ دوبر گِرگ ءَ گھگیری کنت۔ اے گھگیری سلاہ بندیں جنگ ءُ سیاسی دروشم ءَ جنزان کنت کہ روچ ء مروچی مھکم ءُ برجم انت۔ سیاسی پڑا ھمے داب ءَ بی ایس او جوڑ کنگ بیت۔ ورنائیں وانندگ ءُ سینئر کیڈرانی مچانکی لیکہ ھمے بیت کہ بلوچ ءِ ڈیھ گلامی ءُ زورگری ءَ چہ آجو کنگ بہ بیت۔ پاکستانی زورگپتی ءُ ایردستی ءَ رکینگ ءُ وتی جند ءِ راجی وتواجھی گِرگ بہ بیت۔ بی ایس او ءِ جوڑ کنگ ءِ بنیادی ءُ مستریں مول ءُ مکسد ھمے بیت۔ وھد ءِ ھمراھی ءَ یک اوشتے ءِ دیم ءَ کیت ءُ ھمے لوٹ ءُ گزر پیش بیت کہ دزھورکیں سنگت یک راھبندے ءَ یکجاہ کنگ بہ بیت دانکہ راجی جھد ءُ جنز ءَ لس مھلوک ھوار کنگ بہ بیت۔
دیوان ءِ گڈی ءَ دیوان ءَ ساڑی ئیں سنگتان وتی جست ایر کرتگ اَنت ءُ بابل لتیپ ءَ آیانی پسو داتگ اَنت.
