بلوچ یکجھتی کمیٹی ءَ ماں چاگردی رسانکدر ءِ تندجاہ ایکس ءَ آئید ءِ روچ ءَ بلوچ چکچینی ءِ بگیری ءَ زھرشانیانی لڑ شنگ کرتگ ءُ نبشتگ کہ بلوچ یکجھتی کمیٹی ءِ یک لوٹے کہ بلوچ چکچینی سرجم ءَ بند کنگ بہ بیت۔
آئی ءَ گوشتگ کہ گوستگیں ھپتاد سال اِنت ریاست جتائیں شونداتانی پارست ءَ بلوچ چکچینی کنگ ءَ اِنت۔ وتگڑیں لشکرکشی، نشانگ کنگ، کشگ ءُ چگل دیگ ءِ شوندات، زوریں بیگواھی، دروگیں میڑاں کوش، وت آورتگیں توپان، شومک ءُ دگانی سر ءَ ھزارانی کچ ءَ مردم جنجالانی دیمپان اِنت ءُ ھمک بلوچ سانمند بوتگ۔
آئی ءَ گوشتگ کہ بلوچ یکجھتی کمیٹی ءَ اے چکچینی ءِ داں ھلاسی ءَ زرمبشتے ءِ برجم دارگ ءِ کول کرتگ۔ بیا اِت ما درس پہ وتی اے آزیزاں توار چست کن ایں کہ آ بلوچ چکچینی ءِ شونداتانی پارست ءَ کبر کنگ بوتگ اَنت۔ کوہ سلیمان ءَ بگر داں مکران ءُ لیاری ءَ بلوچ یکجاہ ءُ توانمند بہ بنت بلوچ چکچینی ءِ بگیری ءَ اے زرمبشت ءِ بھر بہ بنت۔
آئی ءَ زھرشانیانی وھد ءُ پاسانی لڑ شنگ کرتگ ءُ گوشتگ کہ اے درچ ءَ آئید ءِ روچ ءَ سرجمیں بلوچستان ءَ بیوکیں زھرشانیاں بھر بزور اِت۔ تربت، بلیدہ، پنجگور، گْوادر، ھزدار، گریشگ، نال، ھاران، کلات، کوھلو، پسنی، منگچر، ھب، آواران، دالبدین، مستونگ، سوراب، تمپ، ڈیرہ مراد جمالی، اوتل ءُ سبی ءَ زھرشانی کنگ بیت۔
