تونسہ شریپ: زورگریں پاکستانی لشکر ءِ دست ءَ زور بیگواھیں شھیب ءِ یل نہ کنگ ءِ بگیری ءَ کلمہ چاراہ ءَ زھرشانی کنگ بوتگ۔ زھرشانی ءَ کھول ءِ ھواری ءَ آدگہ سیاسی چاگردی کارکن ءُ لس مردماں بازیں کچے ءَ بھر زرتگ۔
زھرشانی کنوکیں مردماں زور بیگواھیں شھیب ءِ اکس، بینر ءُ پلے کارڈ گوں بوتگ اَنت کہ پلے کارڈانی سر ءَ جتائیں اوگام نبشتہ بوتگ۔
زھرشانی ءَ مردماں تران کرتگ ءُ گوشتگ کہ کوہ سلیمان، ڈیرہ گازی ھان ءَ درکانودی آوار جنی، مردمانی نشانگ کنگ ءُ ترسینگ بند کنگ بہ بیت، شھیب ءَ ھوار درسیں زور بیگواھیں مردم آجو بہ بنت۔
آیانی گوشگ اِنت کہ زوریں بیگواھی چہ بلوچستان ءَ بندات کنگ بوتگ مرچی پاکستان ءِ ھمک شھر بلوچ ریاستی ادارھانی دست ءَ زور بیگواہ کنگ بوگ ءَ اَنت۔ کجام مردم پہ زور بیگواھیں مردمانی آجوئی ءَ توار چست بہ کنت آئی جند بیگواہ کنگ بیت۔
زھرشانی کنوکیں مردماں گوں وتگڑیں سرکار ءُ آمیدگس ءَ لوٹ کرتگ ءُ گوشتگ کہ شھیب ءَ ھوار درسیں زور بیگواھیں مردم زوتاں چہ زوت یل کنگ ءُ زوریں بیگواھی بند کنگ بہ بیت۔
