گوادر: پاکستانی لشکر ءِ دست ءَ چہ دہ سالاں زور بیگواھیں امیربکش ءِ جنک سدپ امیر ءَ وتی شنگ کرتگیں درشانے ءَ گوشتگ کہ پت چہ آئید ءِ نماز ءَ پد گس ءَ کاینت گڑا وتی زھگاں ھمبازاں زور اَنت ءُ آئید ءِ مراد باتی دے اَنت، پت وتی جنکانی سر ءِ سر ءَ دست ءَ ایر کن اَنت آیاں مھر دے اَنت ءُ نیک دواھی کن اَنت۔ بلے ما گھار ءُ برات گوستگیں دہ سال اِنت پہ پت ءِ مھراں تلوسگ ءَ ایں۔
آئی ءَ دیمتر ءَ گوشتگ کہ منی پت امیر بکش 4 اگست 2014 ءَ چہ کلانچ ءَ زور بیگواہ کنگ بوتگ۔ چہ آئی ءَ پد ما ھمک آئیداں شاتکامی ءِ جاہ ءَ آدگرانی زھگاں شاتکامی ءَ گند ایں بس آہ کش ایں کہ بژن مئے پت مئے کر ءَ بوتیں ما چو آدگرانی زھگانی وڑ ءَ شاتکامی کرتگ اَت۔
سدپ امیر ءَ گوشتگ کہ آئید ءِ بیگاہ ءَ ھپت ءَ داں شپ ءِ دوازدہ ءَ بلوچ وائس پار جسٹس ءَ پہ زور بیگواھیں مردمانی آجوئی ءَ ایکس ءَ کمپینے برجم دارگ ءِ جار جتگ، من گوں درسیں مردم دوستاں لوٹ کن آں کہ اے کمپین ءَ ھوار بہ بنت ءُ پہ منی پت امیر بکش ءَ ھوار درسیں زور بیگواھیں مردمانی آجوئی ءَ توار چست بہ کن اَنت۔
