بلوچ نودربر گل آزاد ( بی ایس او آزاد ) ءِ جارکش ءَ وتی شنگ کرتگیں درشانے ءَ گوشتگ کہ بلوچ راجی زرمبشت ( بی این ایم ) ءِ بانی سرکماش ءُ سیاسی رھشون نمیرانیں گلام مھمد، لالا منیر ءُ شیر مھمد ءَ مرچیءَ پانزہ سال پیش زورگریں ریاست ءَ شھید کرتگ ءُ بلوچستان ءَ کشگ ءُ دور دیگ ءِ زوراکیانی شوندات بندات کرتگ۔ ایشی پارست ءَ رند ءَ ھزارانی کچ ءَ سیاسی کارکن نشانگ کنگ بوتگ، آ زوریں بیگواھی ءِ نشانگ کنگ ءُ نمیران کنگ بوتگ اَنت ءُ اے درچ مرچی ھم جتائیں دروشماں برجاہ اِنت۔ چیئرمین گلام مھمد ءُ آدگہ ھمراہ نمیران کرتگ اَنت ءُ زورگریں ریاست ھمے نابزانتی ءِ آماچ بوتگ کہ سیاسی جھدکار چہ وتی کار ءُ مول ءَ پدکنز بنت، بلے آشوبی رھشونانی شھیدی ءَ سیاسی جھدکاران ءَ گیش ھمت ءُ توکل داتگ۔ چوش کہ چیئرمین گلام مھمد ءِ شھیدی ءَ راجی زرمبشت ءَ تیوک ءَ سیاسی جنگ ءَ سکا تاوان ءِ دیمپانی بوتگ ءُ ھما جاہ کہ آئی یل داتگ آئی پرکنگ ءَ بلکیں کرن درکار بنت، بلے آشوبی سپر ءَ راھشونانی دیمونی پہ جھد ءُ زرمبشت ءَ ھواریں سیاسی باسکاں ھمت ءُ توکل ءِ سوب جوڑ بنت۔
آئی ءَ دیمتر ءَ گوشتگ کہ گلام مھمد ریاستی لشکر ءَ چنچو رند ءَ دزگیر کرتگ ءُ زوریں بیگواھی ءِ نشانگ کرتگ۔ آزار داتگ، سیاسی مناپکیانی پارست ءَ آئی چہ بلوچ راجی جھد ءَ دزکش کناھینگ ءَ درسیں بنشون کارگپتگ اَنت، بلے آئی ءَ بلوچ راجی آجوئی ءِ لیکہ زرتگ ءُ بلوچستان ءِ کنڈ کنڈ ءِ مردمانی کر ءَ سر کرتگ۔ پہ بلوچ راجی آجوئی ءَ سیاسی پارٹی ءِ جاہ ءِ پر کنگ ءَ بی این ایم جوڑ کرتگ، پہ بلوچ راجی زرمبشت ءِ مھکم کنگ ءَ ادارھی زانشت دیم ءَ آؤرتگ۔ پہ بلوچ سروکانی یکجاہ کنگ ءُ بلوچ راجی آجوئی ءَ ھم سنتی ءَ آئی بے دروریں دیمونی داتگ۔ آئی ءَ پہ بلوچستان ءِ درسیں سروکانی یک راھبندے ءِ سر ءَ یکجاہ کنگ ءَ شپ ءُ روچ کرتگ دانکہ بلوچ راجی دژمن ءِ بگیری ءَ بلوچ ءِ سیاسی توان یکجاہ بہ بیت دیم پہ دیمی بہ کن اَنت۔ آ سیاسی زانشت، آشوبی لیکہ، پہ کارزانتی ءَ شریں سیاسی راھشونے اَت۔ آئی بلوچ سیاست ءِ دیمروئی دیگ ءَ جوانیں کردے پلیو کرتگ ءُ بلوچستان ءَ ریاست ءِ زورگری ءَ بگراں داں زوراکی درس بلوچ راج ءِ دیم ءَ پدر کرتگ اَنت۔ گلام مھمد ءِ نمیران کنگ ءَ زورگریں ریاست ءَ بنیادی پارست ءَ بلوچ راجی زرمبشت ءَ سکا مزنیں تاوانے داتگ، آئی جاہ ءِ پرکنگ ءَ بلکیں باز وھد درکار بیت، بلے آئی بلوچ راجی زرمبشت ءُ جھد ءَ ھما سکین داتگ آ پہ بلوچ سیاسی کارکناں یک مادنیں راھے ءِ ارزیشت ءَ دار ایت۔ آئی پہ راجی آجوئی ءَ ھما سیاسی پروگرام ءُ لیکہ پیش کرتگ مرچی آ بلوچ راج ءَ وتی کرتگ ءُ بلوچستان ءَ ریاستی زورگپتی منگ ءَ ساجو نہ اِنت۔ ھمے سوب ءَ زورگریں ریاست پہ زور وتی درکانودی زورگپتی ءِ برجاہ دارگ ءِ جھد ءَ کنگ ءَ اِنت۔ مرگاپ ءِ شھیدانی نمیران بوگ سیاسی سروکانی دیمونی پہ مدامی گیر آرگ بیت۔
جارکش ءَ گوشتگ کہ بلوچ راج ءَ گلام مھمد ءُ آدگہ سیاسی سروکانی لیکہ زرتگ ءُ بلوچ راجی جھد ءَ گیشتر پارٹی ءُ گلانی بنیاد ءَ مھکم کنگ ءِ جھد ءَ اَنت۔ زورگریں ریاست پہ آزار دیگ ءُ زور ءَ وتی زورگپتی ءَ برجاہ دارگ لوٹ ایت۔ ھمے سوب ءَ گلام مھمد ءِ وڑیں سیاسی راھشوناں نشانگ کنگ بوتگ اَنت۔ بلے بلوچ جھدکار دژمن ءِ کارپداں شریں وڑے ءَ سرپد بہ بنت ءُ نمیرانیں گلام مھمد ءِ لیکہ ءَ وتی بہ کن اَنت ءُ پارٹی ءُ گلانی بنیاد ءَ راجی جھد ءَ مھکم بہ کن اَنت دانکہ بلوچستان ءَ برجاھیں زورگپتی ھلاس بہ بیت۔
