شھید واجہ گلام مھمد ءَ بی این ایم ءِ پارست ءَ بلوچ راجی زرمبشت ءِ سروکی داں سیاسی باسکاں سر کرتگ۔ آئی ءَ گوشتگ کہ بی این ایم راھشونانی نہ باسکانی گل اِنت۔
اے گپ مرگاپ ءِ شھیدانی بارو ءَ بلوچ راجی زرمبشت ( بی این ایم ) ءِ درونت ءُ آشوبی گل ءِ بنگپ ءِ نیادانی دْرچ ءِ دومی نیاد ءَ گوشگ بوتگ۔ اے نیاد ءَ بی این ایم ءِ رسانکدری کارگشاد کازی داد مھمد ریھان، مردمی ھکانی کارگشاد ڈاکٹر نازر نور ءُ گل ءِ کلانھیں باسک ماما انور ءَ تران کرتگ۔
آیاں گوشتگ کہ شھید واجہ گلام مھمد پہ بی این ایم ءِ کلوہ ءِ سر کنگ ءَ سادھیں زندے گوازینتگ۔ بسانی سر ءَ سپر کرتگ ءُ آئی بلوچ زرمبشت ءِ کلوہ بلوچستان ءِ ھمک کنڈ ءَ سر کرتگ۔ آ تیوک ءَ سیاسی گلے ءِ سروک نہ بوتگ بلکیں یک راجی سروکے بوتگ ءُ وتی سوڑگاں بلوچستان ءِ درسیں سروک ءُ بھرمند گوں وت ھوار برتگ اَنت۔ آ کجام ھند ءَ شتگ گڑا ھمک سیاسی باسک ءِ گند ءُ نند ءِ جھد کرتگ ءُ آئی ءَ آجوئی زرمبشت ءِ کلوہ داتگ۔
آیاں گوشتگ کہ شھید گلام مھمد، لالا منیر ءُ شیر مھمد ءِ شھیدی ءَ بلوچ راج ءَ ھمے مار اتگ کہ اے جھد ءِ سروک دیمونی دیگ ءِ جوزگ ءَ ساجو اَنت ءُ چہ مول ءَ پدکنز نہ بنت۔ چہ اے ویل ءَ پد بلوچ راج ءِ زرمبشت ءِ سر ءَ بیسہ مھکم بوتگ ءُ مزنیں کچے ءَ آجوئی زرمبشت ءَ ھوار بوتگ اَنت۔
آیانی گوشگ اِنت کہ گل وھدے گوں مھکمی ءُ یکشل ءَ وتی نیاداں دیم ءَ ببارت گڑا ھمک باسک وتی بھر ءَ ھوار کنت۔ گل شرکتانی وڑ ءَ نہ بنت کہ آ وتی باسکاں پگار بہ دے اَنت بلکیں اے باسکانی زمہ واری اِنت کہ وتی گل ءَ مالی کمک ءُ مردم بہ دنت۔ زورگار ءِ مھکم کنگ پہ کجام ڈیھ، چاگرد یا ٹولی ءَ بنیادی بستارے دار ایت، ھمک باسک درساں پیش مالی کمک ءِ راہ ءَ شوھاز بہ کنت، پمیشکا مارا مھکم بوگ ءُ دیم ءَ جنزگی اِنت۔
گل ءِ سروکانی نیاد ءِ ھلاسی ءَ باسکانی جستانی پسو ھم دیگ بوتگ اَنت۔ آیاں گوشتگ کہ بی این ایم بلوچ سیاست ءَ وت ما وتیں کردار کشیانی پلہ مرزی ءَ نہ کنت۔ بلوچ ءِ نپانی بگیری ءَ ھچ وڑیں کار بی این ایم ءِ نیمگ ءَ نہ بوتگ ءُ دیم ءَ ھم اے وڑیں گامگیج زورگ نہ بیت کہ چہ آئی ءَ بلوچ ءِ نپاں تاوان بہ بیت۔ پارٹی ءِ بگیری ءَ پندل سازیانی پسو ءَ ما رسانکدر ءَ نہ چہ وتی کرد ءَ دے ایں۔ راج بچار ایت بی این ایم مرچی چہ گوست ءَ چنچو گیش مھکم ءُ اوست داروکیں گلے ءِ وڑ ءَ دیم ءَ آتکگ ایشی ءَ گل ءِ باسکاں مھکم کرتگ۔
کازی ریھان ءَ یک جستے ءِ پسو داتگ ءُ گوشتگ کہ گل ءِ باسکاں چنچو رند ءَ گوں تچکی ءَ گوشتگ کہ ھما وتسر ءُ انچیں پنگپ کہ پہ مئے شونداتاں تاوان اَنت رسانکدر ءَ آیانی بھر مہ بہ اِت۔ چونیں ھم گلے ءِ بگیری ءَ ھچ وڑ ءَ ھما کہ بلوچ پدریچ ءُ آجوئی جھد ءِ بھر بوت رسانکدر ءَ آئی ءِ پسو ءَ ھچ مہ گوش اِت۔ گل ءِ بگیری ءَ وتسریں تکشامانی بھر مہ بہ اِت ءُ تیوک ءَ آجوئی زرمبشت ءِ کلوہ ءَ شنگ بہ کن اِت۔ ھمے مرگاپ ءِ شھیدانی درونت ءُ مئے سیاسی مھتر شھید واجہ گلام مھمد ءِ لیکہ اِنت۔ مارا سکی اوپار کنگ ءُ ھمے پیش دارگی اِنت کہ ما گلام مھمد ءِ لیکھی وارسیں۔
آئی ءَ نگد ءُ وتی سر ءَ نگد کنگ ءِ بارو ءَ تران کرتگ ءُ گوشتگ کہ مارا وتی کرد ءُ کار ءِ سر ءَ چارگ لوٹ ایت۔ باسک ءُ لس بلوچاں اے ھک ھست کہ آ زرمبشت ءُ گوں زرمبشت ءَ ھواریں گلانی ھمک کاراں نگد ءِ چم ءَ بچار اَنت۔ چہ اے ھک ءَ سیاسی باسکانی زبھر کنگ ءَ زرمبشت ناسرجم بیت، بلے مارا ایرادگری ءَ ابید ادارہ ءُ سروکانی سوڑگ ءِ کمک کنگی اِنت۔ گلانی راھبند ءِ بگیری مارا نزور کنت۔ یات بہ بہ اِت کہ نگد شری ءُ دیمروئی کارے، اگ کار ءِ آسر مارا زانگ لوٹ ایت، اے وڑیں کارانی بارو ءَ چہ مردماں ابید سروک ءُ ادارھانی سوڑگ ءِ سر ءَ تپاک بوگی اِنت۔ مارا اے گپ بے ھال کنگی نہ اِنت کہ بی این ایم ءِ گچین بوتگیں سروک ھمبلانی زرتگین اَنت داں چار سال ءَ واک دیگ بوتگ اَنت۔ نگد کنگ ءِ ھواری ءَ آیانی واک ءِ شرپ کنگ مئے سر ءَ المی اِنت۔
