![](https://zrumbesh.com/wp-content/uploads/2024/04/1000283788.jpg)
روکپتی بلوچستان: دوشی سے جتائیں شھراں ایران ءِ بگیریں سلاہ بندیں گل جیش الدل ءَ ایرانی لشکر ءِ بنجلانی سر ءَ اُرش کرتگ۔
بنشون ءِ رد ءَ جیش الدل ءَ روکپتی بلوچستان ءِ شھر چھبار، راسک ءُ سرباز ءَ لشکری بنجلانی سر ءَ اُرش کرتگ۔ چھبار ءَ ایرانی لشکر ءِ کرنل کوچزھی پولیس بنجل ءُ کرنل مسرت پولیس بنجل نشانگ کنگ بوتگ اَنت۔ ھمے وڑ ءَ دوشی راسک ءَ ایرانی پاسدار انکلاب ءِ بنجل ءِ سر ءَ ھم اُرش کنگ بوتگ۔
ایران ءِ بگیریں سلاہ بندیں گل جیش الدل ءَ اُرشانی زمہ واری منّ اتگ ءُ گوشتگ کہ شھریاں کڈن کن ایں کہ آ راسک، چھبار ءُ سرباز شھر ءِ دگانی سر ءَ ترّ ءُ گرد مکن اَنت۔
ایرانی رسانکدر ءَ اے ارشانی گپ راست کرتگ ءُ گوشتگ کہ راسک ءُ چھبار ءَ لشکری بنجلانی سر ءَ اُرش کنگ بوتگ۔
اے بارو ءَ سیستان ءُ بلوچستان ءِ گورنر ءِ ناھب الی رزا مرھماتی ءِ گوشگ اِنت کہ جاور مئے دست ءَ اَنت ءُ گیشتریں ھالاں زوت رسانکدر ءَ شنگ کن ایں۔
جیش الدل ءِ گوشگ اِنت کہ راسک شھر ءِ دمگی بنجل ءِ سلاھانی جاہ مئے دست ءَ اِنت۔
رسانکدر ءَ شنگ بوتگیں تامربندانی تہ ءَ ھمے گندگ بیت کہ تیر ءُ تراکانی توار گوں ترندی ءَ برجاہ اِنت۔
ایرانی رسانکدر ءِ رد ءَ داں اے وھد ءَ آئی جی سی ءِ یک سروگانے ءَ ھوار ایرانی لشکر ءِ پنچ کارمند ءُ سلاہ بندیں پنچ مردم کشگ بوتگ۔