شال: پہ زوربیگواھیں مردمانی پدجنگ ءَ شدکشیں زھرشانی گدان ءَ 5401روچ سرجم بوتگ۔ مرچی زور بیگواھیں نودربر سروک زاکر مجید ءِ مات ھم گدان ءَ نندوک بوتگ۔ یک شمبے ءِ روچ ءَ نیشنل پارٹی ءِ سروک ابدالگپار کمبرانی ءَھوار ادگہ مردم پہ ھمدری درشان کنگ ءَ گدان ءَ آتگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ ریاست وتی زوراکیانی تیز کنگ ءَ اِنت ،پہ کالونیل سسٹم ءِ مھکم کنگ ءَ مردمانی زور بیگواہ کنگ ءُ کشگ ءِ تہ ءَ ھم تیزی آتکگ۔
آئی ءَ گوشتگ کہ کجام وھد ءَ نوکیں سرکارے کیت گڑا بلوچ ورنایانی زوریں بیگواھی ءِ درچ دوبر نوک کنگ بیت۔ پنجاپ ءِ وانگجاہ ءُ کراچی ءَ ورنا زوریں بیگواھی ءِ نشانگ بوگ ءَ اَنت۔ ریاست چہ وتی زوراکیاں بلوچ راج ءَ چہ آئی جند ءِ سرڈگار ءَ ھلاس کرت نہ کنت۔
ماما کدیر گوشتگ کہ پاکستانی لشکر، سی ٹی ڈی ءُ ریاست ءِ درسیں ادارہ بلوچ چکچینی ءَ یک وڑ ءَ شریدار اَنت۔
