بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں کیچ ءُ بولان ءَ زورگر ڈمنیں لشکر،بندساچی شرکت ءُ موبائل پون ٹاور ءِ سر ءَ اُرش کُرتگ ءُ دژمن جانی ءُ مالی تاوان داتگ۔
آئی ءَ گوشتگ کہ سرمچاراں شمبے ءِ سُھب ءِ ھشت ءَ کیچ ءِ ھند مند ءَ بلوچ آباد ءَ پاکستانی لشکر ءِ پیکٹ پھازدارانی سر ءَ اُرش کُرتگ، اُرش ءَ لشکر ءِ دو کارمند جاھی مُرتگ۔
جارکش ءَ گوشتگ کہ شمبے ءِ شپ ءِ ھشت ءُ نیم ءَ سرمچاراں بولان ءَ شھدگ ءِ سر ءَ برجاھیں لشکر ءِ سراج آباد ءِ بنجل ءُ پانگس ءِ سر ءَ گوں راکٹ ءُ دگہ نوکیں سلاھانی گون ءَ اُرش کُرتگ، اُرش ءَ دژمن ءِ یک کارمندے مُرتگ ءُ دو ٹپی بیتگ۔
آئی ءَ گوشتگ کہ دگہ یک اُرشے ءَ سرمچاراں بولان پنجرہ پھل ءِ سر ءَ برجاھیں ٹیلی نار موبائل شرکت ءِ ٹاور تیرجتگ ءُ مشین ءُ سامان تباہ کُرتگ اَنت۔
جارکش ءَ گوشتگ کہ بولان ءَ سیمی اُرش ءَ سرمچاراں پنجرہ پھل ءَ کار کنگ ءَ بیتگیں بندساچی شرکت ءُ لیویز ءِ سر ءَ اُرش کُرتگ ءُ شرکت ءِ مشین ءُ سامان تاوان داتگ اَنت۔
آئی ءَ گوشتگ کہ بی ایل ایپ اے اُرشانی زمہ واری ءَ منّ ایت ءُ بندساچی شرکت ءُ ھندی ٹیکیداراں کڈن کن ایں کہ آ زورگریں لشکر ءِ گون ءَ ھوار مہ بنت ءُ چہ دژمن ءِ شوربندیاں وت ءَ گستا بہ دار اَنت اگاں نہ وتی جان ءُ مال ءِ تاوان ءِ زمہ وار وت اَنت۔
جارکش ءَ گوشت کہ ما لیویز ءَ ھم تچکی ءَ گْوش ایں کہ آ پاکستانی بندساچی شرکتانی پھازداری ءَ مہ کنت۔
میجر گھرام ءَ وتی درشان ءِ گڈی ءَ گوشتگ کہ داں بلوچ سرڈگار ءِ آجوئی ءَ زورگریں لشکر ءُ آئی ءِ دُرسیں سیت مئے نشانگ ءَ اَنت۔
