مشکے : بلوچ راجی زرمبشت ( بی این ایم ) شھید راشد مشکے-آواران ھنکین ءِ نیمگ ءَ ’’ 27 مارچ سیاھیں روچ “ ءِ درگت ءَ دیوانے برجم دارگ بیتگ۔اے نیاد ءَ باسکاں مزنیں کچے ءَ دامگ ءِ پارست ءَ ھم بھر زرتگ۔
نیاد ءَ تْران کنان گْوشتانک دیوکاں گْوشتگ پاکستان ءَ 27 مارچ 1948 ءَ بلوچستان ءِ سر ءَ ارش کرتگ ءُ دستیگ کرتگ، اے روچ پہ بلوچ راج ءَ سیاھیں روچے ءِ بستار ءَ دار ایت۔ چہ ھما روچ ءَ ایردستی ءِ بگیری ءَ بلوچانی آجوئی ءِ جھد یکشل ءَ برجاہ اِنت۔
آیاں گوشتگ کہ تیوک ءَ ھمے یکیں روچ سیاہ نہ اِنت بلکیں ایردستی ءِ ھمک روچ سیاہ اَنت۔ دیمپانی جنگ ءِ میان ءَ چینچو بلوچ شھید بیتگ یا زور بیگواھیانی آماچ اَنت، زور بیگواھیں مردمانی کھول پہ وتی کسانی درگیجگ ءَ در پہ در اَنت یا چہ وتی ھنکین ءَ لڈینگ بیتگ اَنت ءُ باھوٹی زند گْوازینگ ءَ اَنت ، اے درس ایردستی ءِ سان اَنت۔
گوں نیاد ءَ تْران کنان ءَ آیاں گْوشتگ کہ مردمانی پجیگ ءَ ھمک ساھدار وتی آجوئی ءِ واھگدار اِنت ءُ آجوئی ھمک مردم ءِ بنکی اگبال اِنت۔ ھمک مردم داں وتی گڈی زور ءَ پہ وتی آجوئی ءَ جھد کنت۔ ایردست راج زبان ءُ پجار ءِ پجیگ ءَ چہ وتی ھستی ءَ ھم زبھر بہ اَنت۔
دیمتر ءَ آیاں گْوشتگ بلوچاں وتی ایردستی ءِ بنداتی روچ ءَ گوں زورگر ءَ جنگ ءِ جار جتگ ءُ ایردستی نہ من اتگ۔ اے بری ئیں جنگ ءَ نو بیست سال ءَ برز اِنت کہ بلوچ پہ وتی آجوئی ءِ دوبر گرگ ءَ یکشل مڑگ ءَ اِنت۔ اے میان ءَ ھزارانی کچ ءَ سر پہ سرڈگار ءِ موکگ ءَ نْدر بیتگ اَنت۔ بلوچ ءَ اے دراجکشیں جنگ ءَ پشت نہ داتگ ءُ دیمتر ءَ ھم پشت نہ دنت ءُ وتی زمین ءَ موک ایت۔
نیاد ءِ جارچینی ءِ ڈبو ھنکین ءِ کمک کارگشاد سگار ءِ کوپگاں بیتگ۔ نیاد ءَ بی این ایم ءِ بنجاھی مستریں کمک کارگشاد کمال، بنجاھی پتر ءِ باسک چیپ مھمد اسلم، بی این ایم ءِ پیسرگیں بنجاھی پتر ءِ باسک ڈاکٹر ھدابکش ، شھید راشد مشکے-آواران ھنکین ءِ سرکماش مھران، کارگشاد زھرہ ءُ زرمبش بلوچی بھرگ ءِ شونکار سرباز وپا ءَ گپ جتگ۔
