بلوچ راجی زرمبشت ( بی این ایم ) ءِ مردمی ھکانی ادارہ پانک ءِ رسانکدری رھوتدار جمال ءَ گوادر ءَ مجید برگیڈ ءِ پدائی ءَ ارش ءَ شھید بوتگیں کریم جان ءِ بارو ءَ پاکستانی رسانکدر ءِ پندالانی پژدر ءَ وتی تامربندے شنگ کرتگ ءُ گوشتگ کہ من گوں پانک ءَ کار کنگ ءَ آں، پانک یک ادارھے آ بلوچستان ءَ مردمی ھکانی لگتمالی ءِ بگیری ءَ کار کنت۔ زوریں بیگواھی ءِ بارو ءَ کار کنت چنچو زوراکیانی کیس بہ بنت ما آیاں ما گزارش کن ایں ءُ آیانی یادکیس مئے کر ءَ ایر بنت۔
آئی ءَ گوشتگ کہ گوستگیں لھتیں روچ بیت ما پاکستا نی رسانکدر ءَ ھمے گندگ ءَ ایں کہ زوریں بیگواھیانی بابت ءَ پندل سازی کنگ ءَ اَنت۔ آیاں کریم جان ءِ کیس زرتگ ءُ ھمے پندل ءَ سازگ ءَ اَنت اے زور بیگواھیں مردمے ءُ زوریں بیگواھیانی کیس دروگ اَنت، بلےمئے کر ءَ کریم جان ءِ کیس ءِ بارو ءَ گوادر آمیدگس ءِ کاگد ءُ درسیں منانک ھست اَنت۔
جمال گوشتگ کہ کریم جان 23 مئی 2022 ءَ زور بیگواہ کنگ بوتگ چہ آئی زوریں بیگواھی ءَ پد زوت کھول ءَ زھرشانی ھم کرتگ ءُ رسانکدر ءَ آئی زوریں بیگواھی ءِ کیس سکا دیم ءَ آتکگ۔ کریم جان داں دو ماہ ءَ پاکستان ءِ چیریں آزار جاھاں بند کنگ بوتگ چہ ایشی ءَ پد آئی ءِسر ءَ دروگیں کیس جنگ بوتگ۔ 31 جولائی ءَ آمیدگس ءَ پیش کنگ بوتگ ءُ ھمے گوشتگ کہ ما کریم جان ءَ 31 جولائی 2022 ءَ دزگیر کرتگ۔
آئی ءَ گوشتگ کہ کریم جان ءِ سر ءَ دروگیں کیس آمیدگس ءَ رد کرتگ ، کریم جان ءِ کیس ھما وڑ بوتگ کہ آئی پیسر ءَ بازیں منانک بوتگ اَنت گڑا سی ٹی ڈی ِ ءِجوڑ کرتگیں کیس رد کنگ بوتگ۔ آئی وکیل ءَ آمیدگس ءَ ھمے پدر کرتگ کہ آ پیسر ءَ بیگواہ کنگ بوتگ، آئی بیگواھی ءِ درسیں منانک ھم بوتگ اَنت۔ اے وھد ءِ جج ابدالوھید بادینی بوتگ آئی 27 اگست 2022 ءَ ھمے کیس چارتگ ءُ ھمے درسیں منانکانی بنیاد ءَ ھما وھد ءَ یل کناھینتگ۔ اے درسیں کاگدھما وھد ءَ مئے کر ءَ بوتگ اَنت۔
جمال گوشتگ کہ بلوچستان ءَ زوریں بیگواھیءِ جیڑہ اے سکا ترس ناک اِنت۔ اھوالکار اے وھد ءَ نزوریانی کمک ءَ بہ کن اَنت۔ زوراک مردماں بیگواہ ءُ آزار دیگءُکشگ ءَ اَنت۔ ھما کیس کہ پاکستان ءِ آمیدگس ءَ ھست اَنت آیانی بارو ءَ پٹ ءُ بہ کن اَنت چوش مہ بیت کہ اے جیڑہ ءِ بگیری ءَ کار بہ کن اَنت۔
آئی ءَ گوشتگ کہ زوریں بیگواھی ءِ جیڑہ سکا ترس ناک اِنت ءُ زور بیگواھیں مردمانی کھول چہ سالاں گوں جنجالاں زند گوازینگ ءَ اَنت۔ اے دردانی کساس ءَ تیوک ءَ ھما مردم بہ زان اَنت ما اے رنجانی بارو ءَ گمان کرت ھم نہ کن ایں۔ ما گندگ ءَ ایں کہ آ پہ وتی آزیزاں چنچو جھد کنگ ءَ اَنت، آیانی لوٹ ھمیش اِنت کہ مئے مردم آجو کنگ بہ بنت، کھول دگانی سر ءَ زھرشانی ءُ پریات کنگ ءَ اَنت۔
جمال گوشتگ کہ زور بیگواھیں مردمانی کھولانی گوشگ اِنت مئے بیگواھیں مردماں آمیدگس ءَ پیش بہ کن اِت، بلے آ آزرا دیگ ءُ دزگیر کنگ بہ بنت۔ چہ اے جیڑہ ءِ بگیر ءِ جاہ ءَ باید انِت کہ آیا نی کیس ءِ راستی دیم ءَ آرگ بہ بیت۔
