شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5394 روچ سرجم بوتگ۔ یک شمبے ءِ روچ ءَ اموامی نیشنل پارٹی ءِ بنجاھی پتر ءَ باسک شمس جلال زھی گوں وتی ھمبلانی ھمراھمی ءَ پہ ھمدردی درشان کنگ ءَ گدان ءَ آتگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچانی گون ءَ پاکستانی لشکر، چیریں ادارہءُسی ٹی ڈی زوراکی ءُ چکچینی کنگ ءَ اَنت اے درسیں زوراکیانی زمہ وار ھمے ادارہ اَنت۔ سرکار، سیول سوسائٹی ءَ درسیں ادارہ بلوچ چکچینی ءَ یک وڑ ءَ شریدار اَنت چی ءَ کہ درس لشکر ءِ چیر دست اَنت۔
آئی ءَ گوشتگ کہ بلوچ چکچینی، زوریں بیگواھی، ژانگولیں لاش چگل دیگ بوگ ءَ اَنت، لشکرکشیانی سوب ءَ مردم چہ وتی جند ءِ ھنکین ءَ در پہ در کنگ بوگ ءَ اِنت، اے درائیں زوراکیانی بارو ءَ مردمی ھکانی ادارہ ءُ ڈیھ بے توار اَنت، چی ءَ کہ پاکستان آیا نی کوھنیں کمکارے آ پہ وتی باپاریاں بلکیں داں لھتیں وھداں زندگ ئے بدار اَنت۔ بلے زور بیگواھیں مردمانی کھولاں پہ میان استمان ءِ واب ءَ پاد کنگ ءُ اکوام متھدہ ، یورپی یونین ءُ آدگہ ھمساھگانی دلگوش گور کنگ ءَ وتی جھدبرجاہ داشتگ۔
ماما کدیر گوشتگ کہ پہ ریاست ءَ پمیشکا کانود جوڑ کنگ بیت لشکر ءُ آدگہ درسیں ادارہ کانود ءِ پاسداری ءَ بہ کن اَنت۔ ھمے وڑ ءَ چاگرد ءِ تہ ءَ سیول سوسائٹی ءُ آدگہ بنشونانی یک کردے بیت۔ پاکستانی لشکر ءُ چیریں ادارھاں بلوچ چکچینی ءَ وتی چم بستگ اَنت ءُ میار باری کنگ ءَ اَنت، آدگہ ادارہ آیاں کمک کنگ ءَ اَنت۔
