زامران: دہ سال پیش چہ تربت ءَ زورگریں پاکستان لشکر ءِ دست ءَ زور بیگواہ کنگ بوتگیں مراد جان نوانوی ءِ کھول ءَ گوں مردمی ھکانی ادارھاں پہ آئی آجوئی ءَ توار چست کنگ ءِ لوٹ کرتگ۔
کھول ءِ گوشگ اِنت کہ مراد جان 16 جون 2013 ءَ پاکستانی لشکر ءُ چیریں ادارھانی کارمنداں آوار جتگ ءُ بیگواہ کرتگ کہ انگت بیگواہ اِنت۔ مراد جان ءِ زوریں بیگواھی ءَ مئے تیوگیں کھول سکا گمیگ اِنت۔
آئی ءَ گوشتگ کہ ما پہ مراد جان ءِ آجوئی ءَ شال ءَ ھوار داں اسلام آباد ءَ شتگ ایں ءُ توار چست کرتگ۔ ما پہ آئی آجوئی ءَ درسیں در ٹک اِتگ اَنت بلِے مارا ھچ جاہ ءَ انساپ نہ رستگ۔ اگاں مراد جان ءِ سر ءَ چونیں ھم بھتامے ھست گڑا آمیدگس ءَ پیش کنگ بہ بیت۔
کھول ءَ گوں اکوام متھدہ ءَ ھوار جھان ءِ درسیں مردمی ھکانی ادارھانی گون ءَ لوٹ کرتگ کہ پہ مراد ءِ آجوئی ءَ توار چست کنگ ءَ مئے گون ءَ کمک ءَ بہ کن اَنت۔
یات بہ بہ اِت کہ زور بیگواھیں مراد جان نوانوی بلوچی زبان ءِ لچہ کارے ءُ زامران، نوانو ءِ جاہ منند اِنت۔
