لاھور: بلوچ اسٹوڈنٹس کونسل پنجاپ ءِ نیمگ ءَ ھداد سراج ءِ زوریں بیگواھی ءُ بلوچ نودربرانی گون ءَ زوراکی ءُ ترسینگ ءِ بگیری ءَ لاھور پریس کلب ءِ دیم ءَ زھرشانی روانکے کشگ بوتگ۔
روانک ءَ جنک ءُ بچکیں نودربراں بازیں کچے ءَ بھر زرتگ۔ زھرشانی کنوکیں مردماں ھدا داد سراج ءِ اکس، بینر ءُ پلے کارڈ گوں بوتگ اَنت، آیاں زوریں بیگواھی ءِ بگیری ءُ زور بیگواھیں نودربرانی آجوئی ءِ لوٹ کرتگ۔
زھرشانی ءِ درگت ءَ پنجاپ ءَ بلوچ نودربرانی گون ءَ بیوکیں زوراکیانی ءُ زوریں بیگواھیانی بارو ءَ پنتاک ھم بھر ءُ بانگ کنگ بوتگ۔
آیاں تران کرتگ ءُ گوشتگ کہ ھدا داد سراج ء سراج اھمد پہ وانگ ءَ پنجاپ ءِ شھر سرگودھا آتکگ کہ ریاستی ادارھاں آوار جتگ ءُ بیگواہ کرتگ۔ پنجاپ ءِ تہ ءَ بلوچ نودربرانی ترسینگ ءُ زوریں بیگواھی ءِ درچ برجاہ اِنت۔
آیاں گوشتگ کہ پہ بلوچ نودربرانی ترسینگ ءَ پنجاپ ءِ تہ ءَ بلوچ نودربرانی گون ءَ ریاست ءِ زوراکی برجاہ اَنت۔ ایشی مول ھمیش اِنت کہ بلوچ چہ بلوچستان ءِ دوریں ھنداں پہ وانگ ءَ میا اَنت۔ آ انچوش لاچار کنگ بوگ ءَ اَنت کہ وتی وانگ ءَ یل بہ کن اَنت۔
آیاں گوشتگ کہ اے میان ءَ چہ پنجاپ ءِ وانگجاھاں بازیں کچے ءَ نودربر آوار جنگ ءُ زور بیگواہ کنگ بوتگ اَنت۔ بلوچستان ءِ نودربر پہ بلوچ بوگ ءِ بنیاد ءَ ریاستی زوراکیانی آماچ بوگ ءَ اَنت۔
زھرشانی کنوکیں نودربرانی گوشگ اِنت اگاں مئے ھمبل زوت آجوکنگ نہ بوت گڑا ما گوں آدگہ نودربر گلانی ھمراھی ءَ زھرشانی زرمبشتے برجاہ دار ایں۔
