گزہ: رپہ ءُ یونس ھان ءَ اسرائیلی لشکر ءِ جنگی بالگردانی بمبگواریاں زھگاں ھوار بیست ءُ دو مردم مرتگ۔
جھانی رسانکدر ءِ رد ءَ اسرائیلی جنگی بالگرداں رپہ ءَ دو گس ءُ یک ماڑی یے نشانگ کرتگ۔ ایشی آسر ءَ زھگاں ھوار چاردہ مردم مرتگ۔ جبالیہ ءَ اسرائیلی لشکر ءَ یک گسے ءَ گولا آس داتگ کہ ایشی آسر ءَ زھگاں ھوار ھشت پلیستینی مرتگ۔
چم دیستگیں مردمانی گوشگ اِنت کہ گس سرجم ءَ تباہ بوتگ ءُ اُرش ءِ آسر ءَ دگہ باز مردم ھم ٹپی بوتگ اَنت۔
گزہ ءِ سرکار ءِ رد ءَ چہ پاری ھپت اکتوبر ءَ گزہ ءِ سر ءَ اسرائیل ءِ برجاھیں اُرشاں زھگاں ھوار 31 ھزار ھپت سد ءُ بیست ءُ شش پلستینی کشگ بوتگ۔ ھپتاد ءُ سے ھزار، ھپت سد ءُ بیست ءُ نو مردم ٹپی بوتگ اَنت۔
