سیو اسٹوڈنٹس پیوچر ءِ جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ سیو اسٹوڈنٹس پیوچر گوستگیں پنچ سال اِنت کہ بلوچستان ءِ شھر ھزدار ءَ پہ وانگی سرگرمیاں کار کنگ ءَ اِنت، ھمے پارست ءَ جتائیں وانگی دیوان، مراگش، کتاب میڑہ ءُ آدگہ کار برجاہ داشتگ اَنت۔ ایس ایس پی ءِ جوڑ کنگ ءِ مول ھزدار شھر ءَ وانگی چاگردے ءِ دیم ءَ آرگ ءُ نودربرانی جیڑھانی گیش ءُ گیوار کنگ بوتگ کہ گوستگیں وھداں کار کنگ ءِ جوانیں وڑے ءَ جھد کنگ بوتگ۔ اے میان ءَ چنچو جنجال ءُ ناگیگیاں ابید یک راھبندے ءِ رد ءَ پہ نودربراں کار کنگ ءَ بوتگ ایں بلے پہ اے جھد ءِ گیشتر مھکم کنگ ءَ اے راھبند ءَ گل ءِ کاروانے ءَ ھوار کنگ ءِ سوڑگ کرتگ۔
آئی گوشتگ کہ ھزدار ءُ کش ءُ گوراں سرگرمیں کار کنوکیں نودربرانی ھواری ءَ ایس ایس ایپ ءَ بلوچستان ءِ چہ درساں کارکنوک ءُ مستریں نودربر گل بلوچ اسٹوڈنٹس ایکشن کمیٹی ھوار بوگ ءِ بنیادی مول گیشتر وانگی ءُ سیاسی سرگرمیانی نیمگ ءَ جنزگ اِنت۔ گل بلوچستان ءِ گچینیں ادارہ اِنت کہ گوں راستیں بزانتاں پہ بلوچ نودربرانی ھک ءُ آیانی سیاسی ھیلکاری ءَ کار کنگ ءَ اِنت۔ ایشی ءِ تہ ءَ کتاب دودمان، لبزانکی ءُ سیاسی مراگش، پہ نودربرانی ھکاں تکشام، بلوچ لٹریسی کیمپئن ءِ سر ءَ تکشام ءُ آدگہ سرگرمی ھوار اَنت۔ ما سرپد بہ ایں کہ مارا وتی مزنیں نودربر ادارہ ءَ ھوار بوگ ءُ راجی بارو ءَ وتی ورنایانی ھوار کنگ ءَ جھد کنگ لوٹ ایت ءُ چاگرد ءِ تہ ءَ شھزانتیں نودربراں وتی کرد پیلو کنگ لوٹ ایت۔ ھوار کاری ءَ وتی داں مول ءَ سربوگ ءَ شریں بنشونے جوڑینگی اِنت ءُ پہ نودربراں جھد کنگ لوٹ ایت۔ ھمے یکجاھی ءِ پلسپہ ءِ راہ ءَ روگ ءَ ما ایس ایس ایپ ءَ گوں گل ءَ ھوار کنگ ءِ سوڑگ کرتگ، پمیشکا ما سرپد بہ ایں کہ ھمے سپر ءِ کاروان مارا داں وتی گڈی منزل ءَ سر کنت۔
آئی ءَ گوشتگ کہ ما اے سوڑگ پہ بلوچ راجی زانشت ءِ پارست ءَ کرتگ ءُ ھزدار ءَ ھوار بلوچستان ءِ درسیں نودربرانی گون ءَ لوٹ کن ایں کہ بیا اَنت ءُ بلوچ اسٹوڈنٹس ایکشن کمیٹی ءِ راھبند ءَ یکجاہ بہ بنت ءُ پہ نودربرانی ھکاں جھد ءَ ھوار بہ بنت۔ مرچی ءَ پد ایس ایس پی ءِ ھچ وڑیں جتائیں کار نہ بیت بلکیں اے راھبند ءَ ھلاس کن ایں ءُ بلوچ اسٹوڈنٹس ایکشن کمیٹی ءَ ھوار بوگ ءَ ایں۔ ما گل ءَ ھزدار ءِ تہ ءَ دیم ءَ کار ایں ءُ مراگش، کتاب میڑہ، گوں لبزانکی دیواناں پہ کردی ءُ سیادی چاگردے ءَ شریں وڑے ءَ جھد کن ایں۔
