آواران: زورگریں پاکستانی لشکر بازیں کچے ءَ جاؤ ءِ برزی ھنداں شتگ ءُ لشکرکشی ءِ گمان اِنت۔
اھوالکار ءِ رد ءَ زورگریں پاکستانی لشکر دوشی چہ واجہ ءِ باگ ءَ بازیں کچے ءَ برزا شتگ ءُ دوشی ملان وانگجاہ ءَ نشتگ ءُ دگہ باز گاڑی داں کوٹو ءَ شتگ اَنت۔ زورگریں پاکستانی لشکر ءَ کوٹو ءِ وانگجاہ دستیگ کرتگ ءُ نشتگ ڈگارانی سر ءَ ترّ ءُ گرد ءِ میان ءَ وتسر ءَ تیرگواری کرتگ۔
بنشون ءِ رد ءَ چہ نوندڑہ ءِ نیمگ ءَ ھم پاکستانی لشکر ءِ کاروانے روگ ءَ گندگ بوتگ۔ داں گڈی ھالاں پاکستانی لشکر ءِ کاروان مھمد پیر ءَ سر اِنت۔ انچوش گمان کنگ بوگ ءَ انت کہ پاکستانی لشکر، جاؤ ءَ ٹوھیں لشکرکشی یے کنت ءُ وتی زوراکیاں برجاہ دار ایت۔ پہ گیشتریں ھالاں مئے جست ءُ پرس برجاہ اِنت۔
یات بہ بہ اِت کہ زورگریں پاکستانی لشکر ءَ 2015 ءَ جاؤ ءِ برزی میتگاں بازیں جاھاں بنجل ءُ پانگس جتگ ءُ نشتگ چہ پاکستان ءِ وتگڑیں گچینکاری ءَ پیش لشکر ءَ وتی بازیں بنجل ءُ پانگس یل داتگ اَنت۔
