شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5379 روچ سرجم بوتگ۔ سے شمبے ءِ روچ ءَ چہ ژوب ءَ پی ٹی ایم ءِ کارکن پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ مردمی گوستانک شاھد اِنت کہ جھان ءِ کجام کنڈ ءَ زوراکی ءِ بگیری ءَ چست بوتگیں توار گوں کشت ءُ کوش ءُ زوراکی ءَ ھلاس کنگ نہ بوتگ اَنت۔ زوراکاں مدام پہ نزوریں راجانی ایمنیں جھدءِ دارگ ءَ زوراکی کرتگ ءُ پہ آیانی ایردست کنگ ءَ زوراکی ءِ درسیں وڑءُ پیم چکاس اتگ اَنت۔ ھمے وڑ گوں بلوچ راج ءَ کنگ بوگ ءَ اِنت۔
آئی ءَ گوشتگ کہ چہ بلوچاں پد پشتون ھند ھرنائی ءَ چنچو ماہ اِنت لشکر کشی برجاہ اِنت، پشتون آوار جنگ ءُ زور بیگواہ کنگ بوگ ءَ اَنت ءُ آیانی گس ماندارگ بوگ ءَ اَنت۔ بیا اِت بلوچ ءُ پشتون ھواری ءَ ایردستی ءِ زمزیلاں پروش دے ایں۔ زورگریں پاکستان ءِ راجدروھانی دیم ءَ دارگ ءِمول ھمیش اِنت کہ آگوں وتی سرڈگار ءُ شھیداں راجدروھی بہ کن اَنت، ایردستی ءَ گیش مھکم بہ کن اَنت۔
ماما کدیر گوشتگ کہ بلوچ ءُ پشتون زورگریں ریاست ءِ زوراکیانی آماچ اَنت، کسے برات، زھگ ءُ پت شھید کنگ بوتگ یا چیریں آزار جاھاں بندیگ اِنت ءُ آزارانی دیمپان اِنت۔ مارا چہ اے وڑیں ناشرکاراں وت ءَ پھریزگ لوٹ ایت۔
آئی ءَ گوشتگ کہ ھمک بلوچ ءِ سر ءَ ھمے پرز بیت کہ وتی زور بیگواھیں مردمانی کھول ءِ ھال پرسی ءَ بہ کنت آیانی زھگ پہ گرانبھائیں مولے ءَ مرچی پاکستان ءِ چیریں آزار جاھاں بندیگ اَنت ءُ آزار سگگءَ اَنت۔ زور بیگواھیں مردمانی کھول ءِ اے گم وتی کنگ ءُ ایمنیں جھد ءَ بھر زورگ لوٹ ایت۔
