بلوچ وومن پورم ءِ جارکش ءَ گوشتگ کہ ھشت مارچ جنینانی میان استمانی روچ ءِ روچ ءِ درگت ءَ ھاران ءَ مراگشے برجم دارگ بوتگ ءُ مزنیں کچے ءَ مردماں بھر زرتگ۔ مراگش ءِ تہ ءَ گُشتانک ، پینل ڈسکشن ، ٹیبلو ، ڈاکیومنٹری،پیپر ریڈنگ ، کتاب میڑہ، بلوچی ازباب ءُ سوت ھوار بوتگ اَنت۔ مراگش ءَ گل ءِ بُنجاھی آرگنائزر ڈاکٹر شلی ، بُنجاھی ڈپٹی آرگنائزر ھنیپہ ھوار بوتگ اَنت۔
آئی ءَ گوشتگ کہ مراگش ءِ بندات چہ راجی سوت ءَ بوت کہ گوھر نو ءَ راجی سوت ونتگ ءُ پدا ڈاکٹر سمیہ ءَ جنینانی سر ءَ ریسرچ پیپر ءِ ونتگ ۔ دیمترا جنینانی کرد ءِ سر ءَ ٹیبلو ءِ زھگانی نیمگ ءَ پیش کنگ بوت کہ ٹیبلو دو بھر ءَ بوتگ۔ بنداتی بھر ءَ یک چاٹے پیش دارگ بوت کہ زورگیری ءَ پیش ءِ زالبول ءِ کرد پیش دارگ بوتگ آئی تہ ءَ مھناز ، ھانی ، بانڈی ، چاگلی ، مائی بیبو ، گل بی بی ءُ سیمک ءِ کرد پیش کرتگ ءُ دومی بھر زورگیری ءَ پد جنینانی کرد پیش دارگ بوت کہ جنین انو ریاست ءِ زوراکیانی آماچ اِنت۔ مروچی آئی برات ،پت ءُچک بیگواہ کنگ بوگ ءَ اَنت ءُ مروچی جنینانی پجار بیگواہ اِنت۔ گشتانکی بھر ءِ تہ ءَ ڈاکٹر شلی ، اتا نسیر، ڈاکٹر منیر ءُ لاھبہ ھوار بوتگ اَنت ۔
آئی ءَ گوشتگ کہ مراگش ءَ پینل ڈسکشن ھوار بوتگ کہ آئی ءِ سرھال "راج دوستی ءِ تہ ءَ جنین ءِ کرد” کہ آئی ءِ مھمان مسلم شپی ، ایءَ جے پیزی ءُ ڈاکٹر سمیہ بوتگ اَنت ءُ مھماندار اُمیمہ بوتگ ۔مراگش ءِ تہ سوت ھم ھوار بوتگ ، گوھر نور ءُ آمر ءَ سوت گوشتگ ، دیمی بھرانی تہ ءَ کتاب میڑھے ءِ اڈ دیگ بوتگ کہ آئی تہ ءَ جتائیں سرھالانی سرا کتاب ھوار بوتگ اَنت ءُ ھزور بکش ءَ بلوچی ازبابانی درنگازی کرتگ۔
مراگش ءَ تران کنان ءَ جتائیں گشتانکار ءُ مھماناں جینانی روچ ءِ سرا گپ کرتگ ءُ ایشی ءِ سرا زور داتگ کہ زرمبشت ھما وھد ءَ سوبمند بوت کن اَنت کہ آ زرمبشتانی تہ ءَ جنین بھر زور اَنت ءُ کار پڑا وتی کِرد ءَ پیلو کن اَنت ، ءُ بازیں زرمبشتانی درور دیگ بوتگ کہ اود ءَ جنیناں جنزانی تہ ءَ بھر زرتگ ءُ وتی کرد پیلو کرتگ۔
دیمتر ءَ دیوان ءَ اے گپ ءِ سرا زرو دیگ بوتگ کہ ڈسکورس ھست کہ زالبول نزور اِنت ھچ کُت نہ کنت بلے اے گپ ءَ بہ زاناں کہ ڈسکورس ءِ پچ کنوک ھم ریاست اِنت آ زانت کہ جنین جُنزانی تہ بھر بہ زوریت گُڑا مئے ایردستی ءِ روچ ھلاس بنت۔
