کیچ: مزن بند ءُ کولواہ ءَ زورگریں پاکستانی لشکر ءِ برزی ءُ جھلی لشکرکشی برجاہ اِنت۔
اھوالکار ءِ رد ءَ مزن بند ءَ زی زورگریں پاکستانی لشکر بازیں کچے ءَ پترتگ ءُ کوھانی تہ ءَ لشکرکشی کنگ ءَ اِنت۔ لشکر ءَ کور ءُ شیپانی دپاں سنگر گپتگ ءُ نشتگ کوھانی تہ ءَ گوراپی، کنٹانی، زال کلگ ءُ سمائلی ءِ کر ءُ کشاں لشکرکشی کنگ ءَ اِنت۔ اے بارو ءَ مئے گیشیں جست ءُ پرس برجاہ اَنت۔
بنشون ءِ رد ءَ آدینگ ءِ روچ ءَ کولواہ ءِ زربار ءَ شاہ باتل ءِ کِر ءُ کشاں ھوار گوریچان جرک ءَ زورگریں پاکستانی لشکر ءِ جنگی بالگرداں تر ءُ گرد کرتگ۔ انچوش گمان کنگ بیت کہ پاکستانی لشکر کولواہ ءَ ٹوھیں لشکرکشی یے کنت۔
یات بہ بہ اِت کہ پنچ مارچ ءَ بی ایل ایپ ءِ سرمچاراں پاکستانی لشکر ءِ کاروان ءِ سر ءَ ھما وھد ءَ اُرش کُرتگ وھدے کاروان دہ گاڑیانی راھی ءَ چہ بلور ءَ واتر شاہ باتل ءَ آھگ ءَ بوتگ۔ اُرش ءِ زمہ واری بلوچستان آجوئی سنگر ( بی ایل ایپ ) ءَ منّ اتگ ءُ میجر گھرام ءَ گوشتگ کہ سرمچاراں گوں کارشونی ءَ کاروان ءِ پُشت ءِ گاڑی گوں ٹوھین ءُ وتکاریں سلاھاں نشانگ کُرتگ کہ چہ ایشی ءَ دو کارمند مُرتگ۔
