گوادر: بلوچ یکجھتی کمیٹی ءِ سروک ڈاکٹر ماہ رنگ ءَ گوادر پریس کلب ءَ پریس کانپریس کرتگ ءُ گوشتگ کہ گوادر ءَ بوتگیں ھار ءِ تباھی چہ مئے گمان ءَ ھم گیش بوتگ کہ آئی سرجمیں دمگ سکا سانمند کرتگ۔ مرچیگیں کانپریس ءِ رد ءَ گوادر ءَ چہ ھار ءَ تاوان، ھارآماچیں مردمانی زندمان، وتگڑیں میگا پروجیکٹ ءُ دیمروئی ءِ راستی ءُ ریاست ءِ نا دلگوشیانی سر ءَ چمشانک دے ایں۔
ڈاکٹر ماہ رنگ ءَ گوشتگ کہ بلوچ یکجھتی کمیٹی ءِ ٹولی گوستگیں پنچ روچ بیت کہ گوادر ءَ ساڑی اِنت ءُ ھارآماچیں جاور ءُ گوادر ءِ زمینی راہ، گوادر شھر، پیشکان شھر، ڈگار پساؤ، جیمڑی شھر، پلیری، پراہ ءِ توک، سربندن ءُ کر ءُ کشانی ھنداں تر ءُ گرد کنگ ءَ اَنت۔ مئے تر ءُ گردی گزارش ءِ رد ءَ گوادر شھر ءَ ھوار جیمڑی، پیشکان، پلیری، سربندن، کنٹانی، گنز، کلانچ ءُ نزیکیں ھند سکا سانمنداَنت۔ اے درسیں ھندانی ھارانی سو ب ءَ مالی تاوان ءَ شھری سریں پروش کرتگ اَنت ءُ مردمانی زندماں جنجال اِنت۔ گوادر شھر ءَ بگر ءَ داں جیمڑی ءُ سربندن ءَ سدانی کچ ءَ گس سانمند اَنت۔ گسانی سر ءُ دیوال لمب اتگ اَنت۔ تیوک ءَ پلیری اے وھد ءَ سکا سانمند اِنت۔
آئی ءَ گوشتگ کہ اد ءِ مردمانی روزگار ماھیگیری اِنت ءُ اے مردم پاکستان ءِ جوڑ بوگ ءَ پیش چہ کرنان ماھیگیری کنگ ءَ اَنت بلے وتگڑیں سی پیک ءَ مردمانی روزگار تباہ کرتگ۔ چاگردی پارست ءَ مردمانی وشھالیں زندمان گوں لشکری بنجلے ءَ مٹ کنگ بوتگ، مردم سکا ترس آماچ کنگ ءُ ریاستی زوراکیانی دیمپان اَنت۔ اد ءَ کہ لس مردم آباد اَنت پہ ورگ ءَ ساپیں آپ نیست دومی نیمگ ءَ گْوادر ءَ رسانکدر چو مزن ھور ءُ سنگا پور ءِ وڑ ءَ پیش دارگ ءَ اِنت۔
ڈاکٹر ماہ رنگ ءَ گوشتگ کہ گْوادر ءِ مردمانی گوشگ اِنت کہ مارا مزن ھور ءُ سنگاپور نہ لوٹ ایت ما ھما گْوادر ءَ لوٹ ایں کہ ما دو وھد ءِ نان ءَ پہ شرپ وارت بہ کن ایں ءُ گوں ایمنی ءَ زند بہ گوازین ایں کہ چہ کرنان مئے میراس بوتگ۔ ھمے مزن ھور ءُ سنگاپور ءِ نام ءَ مئے دو وھد ءِ نان اچما پلگ بوتگ ءُ مرچی مئے گسانی سر کپتگ اَنت ما اے شھر ءِ واھند بے گس ءَ زند گوازینگ ءَ ایں۔
ڈاکٹر ماہ رنگ ءَ گوشتگ ک اے پریس کانپریس ءِ رد ءَ بلوچ راج ءِ گون ءَ لوٹ کناں کہ یک راجے ءِ بستار ءَ مئے گم ءُ وشی یک اَنت ءُ ما یک راجے ءِ بستار ءَ ریاست ءُ آئی نابودیں ادارھانی ودار ءَ ابید مارا بلوچ ءَ دیم ءَ جنزگ وتی راج ءِ کمک کنگ لوٹ ایت۔
آئی ءَ گوشتگ کہ ما ھمے سرپد بہ ایں اے گرانیں ساھت ءَ ما یکجاہ بہ ایں ءُ یک دیمروئی کنوکیں راجے ءِ بنیاد ءَ ایر کن ایں۔ پمیشکا کہ جھان ءِ گوستانک مارا ھمے گوش ایت کہ راج چہ دگرانی کمک ءَ دیمروئی نہ کن اَنت بلکیں وتی باسکانی سر ءَ دلجم بنت ءُ وتی کمک ءِ بنیاد ءَ راج دیم ءَ جنز اَنت۔ مرچی ما ھمے پلسپہ ءِ بنیاد ءَ اے دمگ ءَ ھوار تیوگیں جھان ءِ دیم ءَ ما بلوچ راج ءَ زندگیں راج ءُ دیمروئی کنوکیں راجے ءِ لڑا ھوار کرت کن ایں۔ مرچی بلوچستان ءَ ھوار تیوگیں جھان ءِ نشتگیں بلوچ دیم ءَ بیا اَنت ءُ گْوادر ءَ ھار ءَ سانمند بوتگیں مردماں ریاست ءِ اوست ءَ یل کنگ ءَ ابید وتی کمک ءَ وت آیانی زندمان ءَ بہ رکین اَنت۔
ڈاکٹر ماہ رنگ ءَ گوشتگ کہ بلوچ یکجھتی کمیٹی پہ گوادر ءِ ھار آماچیں مردمانی کمک ءَ ھم سنتی تکشامے بندات کنت ءُ اے درگت ءَ باند ءَ تیوگیں بلوچستان ءَ سے روچی کمکی گدان جنگ بندات کنت۔ گوں شما درساں ھمے لوٹ ءَ کناں کہ ھم سنتی تکشام ءَ درمان، کمبل، آپ کشیں مشین، راشن ءُ پہ زھگاں وردن ءِ کمک ءَ بہ کن اِت۔
آئی ءَ گوشتگ کہ بلوچ یکجھتی کمیٹی ءِ نیمگ ءَ گْوادر شھر ءَ یک بنجاھی کمکی ءُ راھوتی بنجلے جنگ بیت ھمیشی پارست ءَ بلوچ یکجھتی کمیٹی گْوادر شھر ءُ نزیکیں ھنداں میڈکل کیمپ ءُ کمکی کاراں برجاہ دار ایت۔ گوں بلوچ یکجھتی کمیٹی ءَ راھوت ءُ سرپدی ءَ یک رھوت نمبر ءُ ای میل اڈریس ءُ رسانکدر ءَ پیج ءِ رد ءَ رھوت کرت کن اِت۔
