شال: گیشیں سارتی ءَ شال ءِ بازیں جاھاں گیس نیست مردماں موسا کالونی، سریاب دگ ءَ زھرشانی کرتگ۔ زھرشانی کنوکیں مردماں ھندی واکدار ءُ سوئی گیس شرکت ءِ بگیری ءَ اوگام جتگ۔
زھرشانی کنوکیں مردمانی گوشگ اِنت کہ گیشیں سارتی ءِ وھد ءَ گیس نیست مردم سکا جنجالانی دیمپان اَنت۔ کسانیں زھگ ءُ پیریں مردم نادراھیانی آماچ بوگ ءَ اَنت۔
آیانی گوشگ اِنت کہ ھندی واکدار اے درسیں جیڑھاں سرپد اَنت بلے انگت ءَ گامگیج زورگ ءَ نہ اَنت، ما پمیشکا لاچار بوتگین ءُ زھرشانی کنگ ءَ ایں۔ دانکہ گیس شر کنگ نہ بوتگ مئے زھرشانی برجاہ بیت۔
رند ءَ ھندی واکداراں گوں زھرشانی کنوکیں مردماں گپ ءُ تران کرتگ ءُ گیس ءِ شر کنگ ءِ دلجمی داتگ آیاں وتی زھرشانی ھلاس کرتگ ءُ دگ پچ کرتگ۔
