![](https://zrumbesh.com/wp-content/uploads/2024/03/1000252445-1024x576.jpg)
بلوچ راجی زْرمبشت (بی این ایم) ءِ کمک سرکماش ڈاکٹر جلال ءِ سروکی ءَ رجانکاری ءِ بابت ءَ دیوانے برجم دارگ ءُ پترے ٹاھینگ بوتگ۔
دیوان ءَ گل ءِ کمک سرکماش ءِ ھواری ءَ کستریں کمک سرکماش بابل لتیپ بنجاھی پتر ءِ باسک ھنیپ بلوچ ءُ بلوچی زبان ءِ کلانھیں نبشتہ کار ءُ رجانکار ھسا بجار،کدیر ساگر،میر کیا،زْرمبش بلوچی تَک ءِ کارمستر سرباز وپا، مھروان کمبر، بابا جی آر، ھپیز بلوچ ءُ جاسم بلوچ ءَ بھر زُرتگ۔
ترانکاراں رجانک ءِ ارزشت ءُ بستار ءِ سر ءَ تران کُرتگ ءُ گْوشتگ کہ پہ زبان ءُ لبزانک ءِ دیمروئی ءَ رجانک ءِ ارزشت سک باز اِنت ءُ بی این ایم ءِ واھگ اِنت، گل ءِ لبزانکی سنگت اے پِڑ ءَ دلگوش گْور بہ کن اَنت ءُ پہ زبان ءُ لبزانک ءِ دیمروئی ءَ وتی کِرد ءَ پیلو بہ کن اَنت۔
آیاں گْوشتگ کہ بلوچی ءَ اے وھدی اے گدار ءُ آزمانکی کتاب رجانک کنگ بوتگ اَنت۔ راجکاری ءُ گْوستانکی ءُ دگہ بازیں بنگپاں نبشتہ کنگ بوتگیں کتاب رجانک نہ بوتگ اَنت۔اے دیوان ءِ برجم دارگ ءِ مول ءُ مراد ھمیش اِنت کہ اے پتر ءِ باسک دیمتر ءَ ھمے پِڑ ءَ گچینی کتابانی رجانک کنگ ءِ کار ءَ بندات کنت۔
گُڈی ءَ بی این ایم ءِ کمک سرکماش ڈاکٹر جلال ءُ کستریں کمک سرکماش بابل لتیپ ءُ بنجاھی پتر ءِ باسک ھنیپ بلوچ ءِ سروکی ءَ رجانکارانی پترے ٹاھینگ بوتگ۔
گوں دُرسیں ھمبلانی شور ءُ سلاہ ءَ رجانکارانی پتر ءِ سرکماش ھسابجار ءُ کمک سرکماش کدیر ساگر ءُ بابا جی آر پتر ءِ باسک گچین کنگ بوتگ۔