بلوچ اسٹوڈنٹس ایکشن کمیٹی ءِ جارکش ءَ گوشتگ کہ دو مارچ بلوچ دود ءُ ربیدگی روچ ءِ درگت ءَ نسیرآباد ٹیپول ءَ سباء لٹریری پیسٹول نسیرآباد برجم دارگ بوتگ۔ اشی ءَ ھوار دود ءُ ربیدگی روچ ءِ درگت ءَ بلوچستان ءِ ایدگہ ھند راڈہ شم کوہ سلیمان، شال، ھاران، تربت، اوتل، ڈی جی ھان ءُ تونسہ ءَ ھم مراگش اڈ دیگ بوتگ اَنت۔ مراگشانی تہ ءَ بلوچ ءِ دود ءُ ربیدگ، دود ءِ بابت ءَ بلوچی ازباب، گُشتانک ءُ ایدگہ بھر ھوار بوتگ اَنت۔
آئی ءَ گوشتگ کہ ھمے پیم نسیرآباد ءَ بلوچ دود ءُ ربیدگی روچ ءَ برجاھیں سباء لٹریری پیسٹول مراگش ءِ تہ ءَ گل ءِ بنجاھی کماش شبیر ءُ بنجاھی ھالرسانی کارگشاد اُزیر ھوار بوتگ اَنت۔ مراگش ءِ تہ ءَ جتائیں بھر راجی سوت، گُشتانک، پنتاک، پینل ڈسکش، کسمانک، ٹیبلو، بلوچی ھال اھوال، دوچاپی، بلوچی ازبابانی دیمدرائی، اکس دْرنگازی، کتاب میڑہ ءُ ساز ءُ زیملی ھوار بوتگ اَنت۔
جارکش ءَ مراگش ءِ بندات چہ راجی سوت ءَ بیت کہ شگپتہ بلوچ ءُ ماہ وش بلوچ ءَ راجی سوت ونتگ، دیمی چہ گل ءِ نیمگ ءَ نبشتگیں پنتاک وانگ بوتگ ءُ آئی ءَ پد چہ زھگانی نیمگ ءَ بلوچ ءِ تِپاکی ءِ سرءَ ٹیبلو ئے پیش دارگ ءَ ہوار زالبولانی وانگ ءِ سرءَ کسمانکے ہم بیت پیش دارگ بوتگ۔ گشتانکی بھر ءِ تہ ءَ مولا بکش جمالی، کماش شبیر ءُ گُڈی گُشتانک گوستگیں کماش سبیہ ءَ داتگ۔
آئی ءَ گوشتگ کہ دیوان ءَ دو پینل ڈسکشن ھوار بوتگ اَنت، یکے “دود ءُ بلوچ دود ءُ ربیدگ” کہ آئی ءِ مھمان رھیم سید بوتگ ءُ مھماندار اُزیر بوتگ ءُ دومی پینل ڈسکشن ءِ سرھال “ بلوچ دود ءُ ربیدگ ءِ تہ ءَ زبان ءِ ارزشت” بوتگ کہ آئی ءِ مھمان اباس ھسن ءُ مھماندار ساھر اسھاک بوتگ۔
جارکش ءَ گوشتگ کہ دیوان ءَ بلوچی ھال اھوال ءُ زھگانی چاپ ءِ ھواری ءَ دیمی بھرانی تہ ءَ کتاب میڑھے اڈ دیگ بوتگ کہ آئی ءِ تہ ءَ جتائیں سرھالانی سرءَ کتاب ءُ گل ءِ کتابک “ماتی زبان” ھم ایر کنگ بوتگ۔ کمانچر بلوچ ءِ اکسانی درنگازی ءُ ھزور بکش بلوچ ءَ بلوچی ازبابانی درْنگازی کرتگ۔
آئی ءَ گوشتگ کہ مراگش ءَ تران کنان ءَ جتائیں گشتانکار ءُ مھماناں بلوچ دود ءِ سرءَ گپ جتگ ءُ زور داتگ کہ دود تھنا جسدی چیزے نہ اِنت بلکیں بے جسدی(نن مٹیریل) چیزے ھم کہ آئی ءِ تہ ءَ زبان، تب، سِتک ءُ ایمان، راج دپتر ءُ لبزانک ءَ ھوار ایدگہ بھر ھوار اَنت پمیشکا بلوچ ءَ نہ تھنا وتی سرَبِری دود دارگی اَنت بلکیں مستریں آئی ءَ بلوچ ءِ دودانی پلسپہ رکینگی اَنت کہ مرچی ھمے بے جسدی دودانی سوْب ءَ بلوچ ءِ راج ءُ راج دوستی رک اِتگ۔ بلوچ ءِ گوستانک چہ بلوچ ءِ دوداں پُر اِنت کہ بلوچ مھلوک ءَ بلوچی بنیات ءَ بے نبشھتیں راھبند ءِ تہ ءَ وتی زِند گوازینتگ۔
کُلیں بھرانی دلجمی ءَ سرجم بیگ ءَ رند دیوان ءِ گُڈی بھر ساز ءُ زیملی بھر بوتگ کہ آئی ءِ تہ ءَ نوشین کمبرانی، ھالک پرھاد ءُ لیاجت مراد پارکوئی ءَ سوت جتگ ءُ مراگش ھلاس کنگ بوتگ۔
