شال : پہ زور یگواھیں مردمانی پد جنگ ءَ شدکشیں زھرشانی گدان ءَ 5368 روچ سرجم بوتگ۔ شال ءَ سارتی چار سینٹی گریڈ بوتگ ماما کدیر انگت ءَ گدان ءَ نشتگ۔ شمبے ءِ روچ ءَ نیشنل پارٹی ءِ جنینیں کارکن ءُ آدگہ مردم پہ ھمدردی درشان کنگ ءَگدان ءَ اتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ دود ءُ ربیدگ ءِ زندگ دارگ ءَ باگ بندی ھژدری نہ اِنت، اے بس یک رواجے، دودمان پہ یک روچے ءِ پاگ بندگ ءَ زندگ نہ بیت، بلکیں دودمان ءِ بستار زانگ لوٹ ایت۔
آئی ءِ گوشتگ کہ بلوچ پسگ پہ سرڈگار ءُ دودمان ءِ پھریزگ ءَ ھر وڑیں دیمونی ءِ دیگ ءَ چک پد نہ بنت، مرچیگیں دود ءُ ربیدگی روچ ھما بلوچ بامردانی نام ءَ کہ آ پہ وتن ءِ پھازداری ءُ دودمان ءِ زندگ دارگ ءَ ھرپیمیں سکی اوپار کنگ ءَ اَنت یا کہ کرتگ اش۔ ھزارنی کچ ءَ بلوچ پہ راجی پدریچ ءَ ریاستی ادارھانی دست ءَ شھید بوتگ اَنت یا زنداناں بندیگ اَنت ءُ آزرا سگگ ءَ اَنت۔
ماما کدیر گوشتگ کہ دانکہ دست ءُ پاد سرگ ءَ اَنت ءُ دم روت ءُ کیت اے زرمبشت ءِ بھر باں ءُ پہ بیگواھیں مردمانی آجوئی ءِجھد ءَ برجاہ دار آں۔
