گْوادر: گوستگیں روچاں ترندیں ھور ءُ ھاراں گْوادر شھر ءُ کِر ءُ کشانی ھنداں بازیں میتگ مل اِتگ اَنت۔ چہ گسانی لمبگ ءَ بازیں مردم ٹپی بوتگ اَنت۔ مردمانی بازیں کچے ءَ گاڑی ءُ سامان ھم ھار ءَ برتگ اَنت۔
مرچی بلوچ یکجھتی کمیٹی ءِ سروک ڈاکٹر ماہ رنگ پہ گوادر ءِ ھار آماچیں مردمانی ھال پرسی ءَ گْوادر ءَ شتگ۔
اے وھد ءَ ڈاکٹر ماہ رنگ گْوادر شھر ءَ جتا جتائیں جاھاں تر ءُ گرد کنگ ءُ ھار آماچیں مردمانی ھال پرسی ءَ کنگ ءَ اِنت۔
بنشون ءِ رد ءَ ڈاکٹر ماہ رنگ ءِ گْوادر ءَ سر بوگ ءَ ھک بہ دیئت زرمبشت ءِ سروک ھسین واڈیلہ ءُ دگہ سیاسی ءُ چاگردی کارکن بازیں کچے ءَ ڈاکٹر ماہ رنگ ءِ ھمراہ اَنت۔
یات بہ بہ اِت کہ گوستگیں روچانی ھور ءُ ھاراں پد وتگڑیں سرکار ءِ نیمگ ءَ پہ گْوادر ءِ مردماں ھچ وڑیں کمک کنگ نہ بوتگ۔ سرکار ءِ نیمگ ءَ پہ ھار آماچیں مردمانی کمک ءَ بس رسانکدر ءَ ٹاپار جنگ بوتگ۔
گْوادر ءَ ھار آماچیں مردماں سے روچاں پد ماں پد ءَ سرکار ءِ کمک نہ کنگ ءِ بگیری ءَ زھرشانی کرتگ اَت۔ گْوادر سی پیک ءِ شھر زانگ بیت ءُ پہ گْوادر ءِ دیمروئی ءَ چہ سرکار ءِ نیمگ ءَ مدام ٹاپار جنگ بوتگ بلے گْوادر ءِ مردم انگت ءَ چہ مردمی بنیادی آسراتی ءَ زبھر اَنت۔
